ភ្នំពេញៈ លោក ប៉ែន សុវណ្ណ សមាជិករដ្ឋសភា មកពីគណបក្សសង្គ្រោះជាតិ និងជាអតីតនាយករដ្ឋមន្ត្រីកម្ពុជា បានទទួលមរណភាពហើយ នៅវេលាយប់ថ្ងៃទី២៩ ខែតុលា ឆ្នាំ២០១៦នេះ។ នេះបើយោងហ្វេសប៊ុកផ្លូវការរបស់លោក កឹម សុខ ប្រធានស្ដីទីគណបក្សសង្គ្រោះជាតិ ចេញផ្សាយមុននេះ។

សេចក្ដីប្រកាសព័ត៌មានរបស់គណបក្សសង្គ្រោះជាតិ នៅក្នុងទំព័រហ្វេសប៊ុករបស់លោក កឹម សុខា ឲ្យដឹងថា លោក ប៉ែន សុវណ្ណ ជាសមាជិក ជាអតីតនាយករដ្ឋមន្ត្រីសម័យសាធារណរដ្ឋប្រជាមានិតកម្ពុជា និងជាឧត្តមក្រុមប្រឹក្សាគណបក្សសង្គ្រោះជាតិ បានទទួលមរណភាព នៅវេលាម៉ោង៧៖១៧នាទី យប់ថ្ងៃទី២៩ ខែតុលា ឆ្នាំ២០១៦ ក្នុងជន្មាយុ៨០ឆ្នាំ ដោយរោគាពាធ។ លោក ប៉ែន សុវណ្ណ ទទួលមរណភាពនៅគេហដ្ឋានរបស់លោកនៅទីរួមខេត្តតាកែវ។

ជុំវិញមរណភាពរបស់លោក ប៉ែន សុវណ្ណ នៅពេលនេះ Post News មិនអាចទំនាក់ទំនងសុំការអត្ថាធិប្បាយណាមួយពីអ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានទេ នៅយប់ថ្ងៃទី២៩ ខែតុលានេះ ដោយទូរស័ព្ទពុំអាចទំនាក់ទំនងបាន៕