ស៊ីអិនអិនៈ យន្តហោះចម្បាំងមួយគ្រឿងរបស់ប្រទេស រុស្ស៊ី និងយន្តហោះយោធាមួយគ្រឿងរបស់អាម៉េរិក ហោះស្ទើរតែបុកគ្នានៅលើអាកាស ដោយនៅសល់គម្លាតពីតែប្រមាណជាងកន្លះម៉ែត្រប៉ុណ្ណោះ អំឡុងពេលហោះហើរនៅក្នុងប្រទេស ស៊ីរី កាលពីដើមខែតុលានេះ។

យោងតាមសារព័ត៌មាន ស៊ីអិនអិន ចេញផ្សាយនៅថ្ងៃទី២៩ ខែតុលា ឆ្នាំ២០១៦ បានឲ្យដឹងថា កងកម្លាំងទ័ពអាកាសអាម៉េរិក ឧត្តមសេនីយ៍ឯក Jeffrey Harrigian ដែលជាអ្នកបញ្ជាប្រតិបត្តិការអាកាសអាម៉េរិក នៅទូទាំងតំបន់មជ្ឈិមបូព៌ា បាននិយាយថា នៅក្នុងហេតុការណ៍នោះ យន្តហោះទាំងពីរ ស្ទើរតែប៉ះទង្គិចគ្នាទៅហើយ។

មន្រ្តីយោធាអាម៉េរិក បាននិយាយថា កាលពីថ្ងៃទី១៧ ខែតុលាកន្លងទៅ យន្តហោះទាំងពីរគ្រឿង គឺប្រើល្បឿនរាប់រយម៉ាយក្នុងមួយម៉ោង ដោយគ្មានបើកភ្លើងបំភ្លឺឡើយ។ យន្តហោះទាំងពីរ គឺស្ថិតនៅចម្ងាយពីគ្នាត្រឹមតែជាងកន្លះម៉ែត្រប៉ុណ្ណោះ។ យន្តហោះចម្បាំងរុស្ស៊ីមួយគ្រឿងនោះ គឺបានហោះអមយន្តហោះចារកម្មរុស្ស៊ីមួយគ្រឿងទៀត៕