ស្ត្រីជាម្តាយរបស់កូន២នាក់ ដែលសុទ្ធតែមានសញ្ជាតិអាមេរិក ត្រូវបានបញ្ជូនទៅកាន់ប្រទេសម៉ិកស៊ិកវិញកាលពីព្រឹកថ្ងៃព្រហស្បតិ៍្តដោយសារការផ្លាស់ប្ដូរគោលនយោបាយអាមេរិកចំពោះជនអន្តោប្រវេសន៍ដែលគ្មានឯកសារស្របតាមក្រឹត្យច្បាប់ថ្មីរបស់លោកត្រាំ។ នេះបើយោងតាមរយ:សារព័ត៌មាន CNN ចេញផ្សាយនៅថ្ងៃទី១១ ខែកុម្ភ: ឆ្នាំ២០១៧។
លោកមេធាវី Ray Ybarra Maldonado បាននិយាយថា ស្ត្រីដែលរស់នៅក្នុងទឹកដីអាមេរិកដោយគ្មានឯកសារនោះ ត្រូវបានចាប់ឃុំខ្លួននៅក្នុងទីក្រុង Phoenix នៃរដ្ឋ Arizona កាលពីថ្ងៃពុធ នៅពេលដែលអ្នកស្រីបានឈប់ដើម្បីឲ្យគេត្រួតពិនិត្យនៅឯការិយាល័យអន្តោប្រវេសន៍អាមេរិកមួយ។
លោក Maldonado បាននិយាយថា ខ្ញុំត្រូវបានស្ថានកុងស៊ុលម៉ិកស៊ិកប្រាប់ថា កូនក្តីរបស់ខ្ញុំត្រូវបានបញ្ជូនខ្លួនចេញពីសហរដ្ឋអាមេរិក។
ស្រ្តីជាម្តាយឈ្មោះ Garcia de Rayos វ័យ ៣៦ឆ្នាំ បានត្រូវមន្ត្រីអន្តោប្រវេសន៍អាមេរិកត្រួតពិនិត្យឃាត់ខ្លួនចំពោះការប្រើប្រាស់លេខសន្តិសុខសង្គម ឬហៅថា Social Security number ក្លែងក្លាយ។
កាលពីល្ងាចថ្ងៃព្រហស្បតិ៍្ត អ្នកស្រី Rayos ត្រូវបណ្តេញចេញពីសហរដ្ឋអាមេរិកទោះបីជាបានរស់នៅអស់រយ:ពេលជាង២២ឆ្នាំយ៉ាងណាក្តី៕
មតិយោបល់