វៀតណាម: ប្រព័ន្ធផ្សព្វផ្សាយក្នុងស្រុករាយការណ៍នៅថ្ងៃសុក្រនេះថា បញ្ជាការដ្ឋានកងទ័ពការពារព្រំដែននៅភាគខាងជើងខេត្ត Ha Giang របស់ប្រទេសវៀតណាម និងក្រុមកងឯកភាពប៉ូលិសព្រំដែននៅភាគនិរតីខេត្ត Yunnan ដែលនៅជាប់ខេត្ត Wenshan របស់មហាយក្សនៅអាស៊ី បានចាប់ផ្តើមធ្វើសមយុទ្ធយោធាប្រឆាំងភេរវកម្មរួមគ្នា។ នេះបើយោងតាមការចេញផ្សាយដោយសារព័ត៌មានចិនស៊ិនហួ នៅថ្ងៃទី២៩ កក្កដា ឆ្នាំ២០១៦នេះ។
សមយុទ្ធយោធារួមគ្នារវាងមហាយក្សចិននិងវៀតណាម មានឈ្មោះថា Thien Thanh 2016 (Tianqiang 2016) ដោយមានការចូលរួមពីតំណាងមកពីក្រសួងការពារជាតិ, មេបញ្ជាការនៃកងទ័ពការពារព្រំដែន, គណ:កម្មាធិការប្រជាជន Giang Ha របស់ប្រទេសវៀតណាម បានធ្វើឡើងនៅច្រកទ្វារព្រំដែនអន្តរជាតិ Thanh Thuy នៅខេត្ត Ha Giang នៅជាប់ព្រំដែនចិន ប្រហែល ២២០គីឡូម៉ែត្រ ភាគខាងជើង នៃរដ្ឋធានីហាណូយ កាលពីថ្ងៃព្រហស្បតិ៍ម្សិលមិញ នេះបើយោងតាមកាសែតនៅក្នុងស្រុក Quan Doi Nhan Dan (កងទ័ពប្រជាជន)។
សូមបញ្ជាក់ថា ការធ្វើសមយុទ្ធនេះបានបង្ហាញនូវការជឿទុកចិត្តគ្នាទៅវិញទៅមករវាងកម្លាំងប្រដាប់អាវុធប្រទេសជិតខាងទាំងពីរនេះ និងកសាងមូលដ្ឋានគ្រឹះសម្រាប់អាជ្ញាធរពាក់ព័ន្ធនានា ដើម្បីកសាងក្របខណ្ឌច្បាប់ស្តីពីកិច្ចសហប្រតិបត្តិការអនុវត្តច្បាប់រវាងកងកម្លាំងព្រំដែន នៅក្នុងការឆ្លើយតបទៅនឹងស្ថានភាពសង្គ្រោះបន្ទាន់ ក៏ដូចជា ការសម្របសម្រួលក្នុងការដោះស្រាយករណីភេវកម្មផ្សេងៗនៅតាមបន្ទាត់ព្រំដែនផងដែរ៕
មតិយោបល់