ព័ត៌មានអន្តរជាតិ

«កម្មវិធីសុខាភិបាល »ក្នុងក្តីស្រមៃរបស់លោក អូបាម៉ាក្លាយជាស្រមោល ក្រោយលោក Tom Price …

អាមេរិក:​ Tom Price ត្រូវបាន​ជ្រើស​រើស​ឲ្យ​ចូល​កាន់​តំណែង​ជា​រដ្ឋ​មន្ត្រី​ក្រសួង​សុខាភិបាល​អាមេរិក​ ដែលបាន​ស្បថ​ចូល​កាន់​តំណែង​ជា​ផ្លូវ​ការនៅ​ឯ​សេតវិមាន​កាលថ្ងៃ​សុក្រ​នេះ​ ដោយ​មាន​អធិបតី​ភាព​លោក​អនុ​ប្រធានាធិបតី Mike Penceចូលរួម ។ យោងតាមរយ:សារព័ត៌មាន CNN ចេញផ្សាយនៅថ្ងៃទី១១ ខែកុម្ភ: ឆ្នាំ២០១៧។

ការ​ស្បថ​ចូល​កាន់​តំណែង​នេះ​រៀប​ចំ​ឡើង​ប៉ុន្មាន​ម៉ោង​ក្រោយ​ពេល​ដែល​ព្រឹទ្ធសភា​អាមេរិក​បាន​បោះ​ឆ្នោត ​៥២ ​ទល់​នឹង ​៤៧ ​សំឡេង​ដើម្បី​តែង​តាំង​លោក ​Tom Price មក​ពី​ខាង​គណបក្ស​សាធារណរដ្ឋ​ឲ្យ​ចូល​កាន់​តំណែង​ថ្មី​ជា​រដ្ឋ​មន្ត្រី​ក្រសួង​សុខាភិបាល។

លោក ​Price គឺ​ជា​សមាជិកសភា​ដែល​ធ្លាប់​ជា​យុទ្ធជន​មួយ​រូប​មក​ពី​រដ្ឋ Georgia និង​ជា​ពេទ្យ​វះកាត់​ផ្នែក​ឆ្អឹង ដែល​លោក​គឺ​ជា​អ្នក​ដែល​ប្រឆាំង​នឹង​កម្មវិធី​ធានា​រ៉ាប់រង​សុខភាព Affordable Care Act ឬ​ដែល​ត្រូវ​បាន​គេ​ស្គាល់​ថា​ជា Obamacare នោះ។

ក្នុង​នាម​ជា​រដ្ឋ​មន្ត្រី​ក្រសួង​សុខាភិបាល​ថ្មី លោក Price ដែល​មាន​អាយុ ៦២ឆ្នាំ នឹង​ដឹកនាំ​យុទ្ធនាការ​ដើម្បី​លុប​ចោល​ច្បាប់​ធានា​រ៉ាប់រង​សុខភាព​ដែល​អនុញ្ញាត​ឲ្យ​ពលរដ្ឋ​អាមេរិកាំង ២០ លាន​នាក់​ទទួល​បាន​ការ​ធានារ៉ាប់រង​សុខភាពត្រឹមត្រូវ៕

មតិយោបល់