រុស្ស៊ី: ហាក់បីដូចជាសុបិន្តយ៉ាងអាក្រក់មួយ នៅប្រទេសនេះ បន្ទាប់ពីបាតុកម្មកាលថ្ងៃអាទិត្យ ពលរដ្ឋរុស្ស៊ីរាប់ម៉ឺននាក់ បានប្រមូលផ្ដុំគ្នាតាមដងផ្លូវ នៅទីក្រុងម៉ូស្គូ ដើម្បីធ្វើការតវ៉ាប្រឆាំងដ៏ធំមួយ ទៅនឹងអំពើពុករលួយរបស់រដ្ឋាភិបាល ដែលមិនធ្លាប់មានជាច្រើនឆ្នាំកន្លងមក។ នេះយោងតាមរយ: សារព័ត៌មាន BBC ចេញផ្សាយនៅថ្ងៃទី ២៩ ខែមីនា ឆ្នាំ២០១៧។

ក្នុងចំណោមរូបថត នៅក្នុងសកម្មភាពបង្ក្រាប និងចាប់ខ្លួនរបស់រដ្ឋាភិបាលរុស្ស៊ី បានបង្ហាញពីរូបភាពស្ត្រីម្នាក់ គួរឲ្យសង្វែគ ត្រូវបានចាប់លើកអូសចេញទៅឆ្ងាយ ដោយមន្ត្រីប៉ូលិសជាច្រើន នៅក្នុងទីក្រុងម៉ូស្គូ។

សូមជំរាបថា នៅក្នុងហេតុការណ៍នោះ មេដឹកនាំដ៏សំខាន់របស់គណបក្សប្រឆាំង នៅក្នុងប្រទេស លោក Alexei Navalny ដែលជាអ្នកដឹកនាំការតវ៉ាប្រឆាំងនេះ ត្រូវបានចាប់ខ្លួន និងយ៉ាងហោចណាស់ ក្រុមអ្នកតវ៉ាចំនួន ៥០០ នាក់ ក៏ត្រូវបានប៉ូលិសចាប់ឃុំខ្លួន នៅក្នុងរដ្ឋធានី និងនៅទូទាំងប្រទេសផងដែរ។

គួរបញ្ជាក់ដែរថា បាតុកម្មនេះ ទំនងជាចលនាចូលរួមរបស់ប្រជាជនធំជាងគេបំផុត ចាប់តាំងពីបាតុកម្មប្រឆាំង រដ្ឋាភិបាលនៅក្នុងឆ្នាំ ២០១១ និង២០១២ ។ វាត្រូវបានធ្វើទ្បើង ក្នុងគោលបំណងអំពាវនាវឲ្យមានការលាលែង ចេញពីតំណែងរបស់នាយករដ្ឋមន្ដ្រី លោក Dmitry Medvedev ជុំវិញការចោទប្រកាន់ពាក់ព័ន្ធនឹងអំពើពុករលួយ ហើយបើតាមរយ:រូបភាពទូរទស្សន៍ បានបង្ហាញពីក្រុមបាតុករស្រែកជាមួយនឹងឃ្លាថា «ចុះចេញជាមួយលោកពូទីន!, ប្រទេសរុស្ស៊ី នឹងគ្មានលោកពូទីន! និង លោកពូទីន គឺជាចោរលួច!» ៕