អាមេរិក: ថ្លែងទៅកាន់ភ្នាក់ងារ CBS ប្រធានាធិបតីលោក ដូណាល់ ត្រាំ បានរៀបរាប់ថា លោក គឹម ជុងអ៊ុន ជាមេដឹកនាំកូរ៉េខាងជើងដ៏ឆ្លាតវៃមួយរូប ដែលបានទ្បើងកាន់កាប់អំណាច ទាំងខ្លួននៅវ័យក្មេង បើទោះបីត្រូវប្រឈមផលវិបាក ក្នុងការដឹកនាំប្រទេសជាច្រើន អំទ្បុងពេលទ្បើងកាន់អំណាច ជាមួយមនុស្សខ្លាំងជុំវិញខ្លួន។ នេះបើយោងតាមរយ: សារព័ត៌មាន BBC ចេញផ្សាយនៅថ្ងៃទី០១ ខែឧសភា ឆ្នាំ២០១៧។

ចំពេលមានភាពតានតឹងខ្លាំងឡើង អំពីកម្មវិធីនុយក្លេអ៊ែររបស់កូរ៉េខាងជើងលោក ត្រាំបាននិយាយថា ខ្លួនក៏មិនទាន់ដឹងដែរថា លោក គីម មានចេតនាយ៉ាងណានោះទេ?

កន្លងមកមេដឹកនាំកូរ៉េខាងជើង ធ្លាប់បានប្រហារជីវិតពូរបស់ខ្លួន កាលពីពីរឆ្នាំមុន បន្ទាប់ពីលោកបានឡើងកាន់អំណាច ហើយនៅពេលថ្មីៗនេះ លោកត្រូវបានគេសង្ស័យថា បានបញ្ជាឲ្យសម្លាប់លោក គីម ជុងណាម ត្រូវជាបងប្រុស​ម្តាយទីទៃខ្លួនផងដែរ។

ទាំងនេះហើយ ដែលជាហេតុផលនាំឲ្យប្រធានាធិបតីលោក ត្រាំ ចោទសួរទៅមេដឹកនាំកូរ៉េខាងជើងឲ្យឆ្លើយ។

លោក ត្រាំ បានលើកទ្បើងថា «មនុស្សជាច្រើន និយាយថា តើលោក គីម មានចេតនាយ៉ាងណា ជុំវិញភាពតានតឹងនៅលើឧបទ្វីបកូរ៉េ? ខ្ញុំ (ត្រាំ) ក៏មិនទាន់ដឹងដែរ… ប៉ុន្តែអ្វីដែលមើលឃើញនោះ គាត់ជាមេដឹកនាំវ័យក្មេងម្នាក់ ដែលមានអាយុទើបតែ ២៦ ឬ ២៧ ឆ្នាំប៉ុណ្ណោះ ដែលបានទ្បើងកាន់កាប់អំណាច នៅពេលដែលឪពុករបស់គាត់បានស្លាប់។ អ្វីដែលពិសេសនោះ គឺគាត់អាចដោះស្រាយឧបសគ្គដ៏លំបាកជាច្រើន ក្នុងអំទ្បុងពេលដឹកនាំប្រទេស ទាំងខ្លួននៅវ័យក្មេង ដែលត្រូវប្រឈមមុខនឹងមន្ត្រីមានអំណាច និងខ្លាំងៗជាច្រើន ក្នុងប្រទេស ទម្រាំបានការស្រុះស្រួលគ្នា ដឹកនាំប្រទេសរហូតមកទល់បច្ចុប្បន្ននេះ»៕