ជប៉ុន: រដ្ឋាភិបាលក្រុងតូក្យូ នៅថ្ងៃច័ន្ទនេះ បាននិយាយថា នឹងបញ្ជូនឯកអគ្គរាជទូតរបស់ខ្លួន ត្រឡប់ទៅកាន់ប្រទេសកូរ៉េខាងត្បូងវិញ ក្រោយជប៉ុនបានសម្រេចធ្វើមាតុភូមិនិវត្តន៍ជាបណ្ដោះអាសន្ន អគ្គរាជទូតប្រចាំទីក្រុងសេអ៊ូល លោក Yasumasa Nagamine អស់រយ:ពេលជិត ៣ខែ ក្នុងគោលបំណងតវ៉ាជំទាស់ទៅនឹងការតម្លើងរូបសំណាកស្ត្រីតំណាងឲ្យអតីតទាសករផ្លូវភេទ នៅខាងមុខស្ថានកុងស៊ុលជប៉ុន ប្រចាំទីក្រុងប៊ូសាន។ នេះបើយោងតាមរយ: សារព័ត៌មាន Channel News Asia ចេញផ្សាយនៅថ្ងៃទី០៤ ខែមេសា ឆ្នាំ២០១៧។
ប្រទេសទាំងពីរ កាលពីឆ្នាំ ២០១៥ បានព្រមព្រៀងគ្នាលើរឿងស្ត្រីលួងលោមកូរ៉េខាងត្បូង ដែលត្រូវបានកងទ័ពជប៉ុន បង្ខំឲ្យធ្វើទាសករផ្លូវភេទ កាលពីអំឡុងសម័យសង្រ្គាមលោក លើកទី២ ថានឹងបញ្ចប់ ព្រមទាំងអាចដោះស្រាយទៅបានរហូតនោះ ប្រសិនបើលក្ខខណ្ឌទាំងអស់ នៃកិច្ចព្រមព្រៀងនេះត្រូវបានសម្រេច ដោយរួមបញ្ចូលទាំងការសុំទោសពីជប៉ុន និងការផ្ដល់មូលនិធិមួយ ដើម្បីជួយជនរងគ្រោះទាំងនោះ។
ប្រទេសជប៉ុន បាននិយាយថា ការតម្លើងរូបសំណាកក្មេងស្រីម្នាក់ អង្គុយដោយជើងទទេរ នៅលើកៅអីមួយ ខាងមុខស្ថានកុងស៊ុលជប៉ុន ប្រចាំទីក្រុងប៊ូសាន ក្នុងប្រទេសកូរ៉េខាងត្បូង កាលពីចុងឆ្នាំមុន គឺបានបង្ហាញពីការរំលោភលើកិច្ចព្រមព្រៀងនោះ។
រដ្ឋមន្រ្តីការបរទេសជប៉ុន លោក Fumio Kishida បានប្រាប់អ្នកកាសែតថា ឯកអគ្គរដ្ឋទូតលោក Yasumasa Nagamine នឹងវិលទៅកាន់ប្រទេសកូរ៉េខាងត្បូង នៅថ្ងៃអង្គារសប្ដាហ៍នេះ បន្ទាប់ពីត្រូវបានហៅឲ្យត្រទ្បប់ទៅវិញនៅដើមខែមករា៕
មតិយោបល់