ព័ត៌មានអន្តរជាតិ

ការប៉ះទង្គិចគ្នា នៅភាគខាងត្បូងប្រទេសលីប៊ី សម្លាប់មនុស្សជាង ១៤០ នាក់

លីប៊ី: អ្នកនាំពាក្យកងទ័ពម្នាក់ នៅថ្ងៃសុក្របានបង្ហើបឲ្យដឹងថា ការប៉ះទង្គិចគ្នាមួយ នៅមូលដ្ឋានអាកាស Brak Al-Shati ភាគខាងត្បូងនៃប្រទេស រវាងកងកម្លាំងលីប៊ី និងពួកជីវពលប្រដាប់អាវុធ បានសម្លាប់មនុស្ស ១៤១ នាក់ និងជាច្រើននាក់ទៀតរងរបួស។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី២០ ខែឧសភា ឆ្នាំ២០១៧។

លោក Ahmad Al-Mimari បានថ្លែងនៅក្នុងសន្និសីទកាសែតមួយ កាលពីថ្ងៃសុក្រថា ចំនួនអ្នកស្លាប់ និងរបួស នៅក្នុងហេតុការណ៍នោះ រួមមានទាំងកងទ័ព និងជនស៊ីវិលផងដែរ បន្ទាប់ពីកងកម្លាំងលីប៊ី បានផ្ដើមបើក ការវាយប្រហារដែនអាកាសលើតំបន់បណ្ដាញពួកសកម្មប្រយុទ្ធ នៅភាគខាងត្បូងប្រទេស ដើម្បីជាការសងសឹក។

ពាក់ព័ន្ធនឹងការវាយប្រហារនេះ ប្រធានបេសកកម្មការគាំទ្ររបស់អង្គការសហប្រជាជាតិ នៅលីប៊ីលោក Martin Kobler បានធ្វើការថ្កោលទោសផងដែរ ដោយលើកទ្បើងថា «ខ្ញុំពិតជាខឹងសម្បាយ៉ាងខ្លាំង បន្ទាប់ពីរបាយការណ៍ បានបង្ហាញនៅហេតុការណ៍នេះ មានចំនួនអ្នកស្លាប់យ៉ាងច្រើន ដោយរួមទាំងជនស៊ីវិល»។

ក្នុងនោះលោកបានបន្ថែមថា ការប៉ះទង្គិចគ្នា ដែលបានសម្លាប់ជនស៊ីវិលនេះ នឹងបង្កើតទៅជាឧក្រិដ្ឋកម្មសង្រ្គាម ដែលអាចត្រូវបានកាត់ទោស ដោយតុលាការព្រហ្មទណ្ឌអន្ដរជាតិ៕

មតិយោបល់