Post News Media ព័ត៌មានអន្តរជាតិ សប្បាយក្លាយជា...

សប្បាយក្លាយជាទុក្ខ, មនុស្ស ៣០នាក់ នៅក្នុងពិធីបុណ្យលាបពណ៌ដ៏ល្បីល្បាញនៅឥណ្ឌា

(ឥណ្ឌា)៖ មនុស្ស ៣០នាក់បានស្លាប់ និង ៤០នាក់រងរបួស បន្ទាប់ពីការសប្បាយ រីករាយបានប្រែក្លាយទៅជាទុក្ខ ព្រោះអំពើហិង្សា និង គ្រោះថ្នាក់ចរាចរណ៍ជាច្រើនករណី បានកើតឡើងនៅ រដ្ឋ Uttar Pradesh ប្រទេសឥណ្ឌា។ នេះបើតាមការផ្សាយរបស់ទីភ្នាក់ងារព័ត៌មានស៊ិនហួរ នៅរសៀលថ្ងៃសុក្រ ទី២៥ ខែមីនា ឆ្នាំ២០១៦។
អាជ្ញាធររដ្ឋ Uttar Pradesh បានអះអាងថា មនុស្សស្លាប់ទាំងនោះគឺស្ថិតនៅតំបន់ផ្សេងគ្នាទូទាំងរដ្ឋ ហើយអំពើហិង្សា និង ការធ្វេសប្រហែសរបស់ប្រជាជនទាំងនោះ បានកើតឡើងជាច្រើនករណី ដែលជាហេតុនាំឲ្យអាជ្ញាធរពិបាកគ្រប់គ្រង ទើបបណ្តោយឲ្យមានមនុស្សស្លាប់ជាច្រើននាក់បែបនេះ។ 
មនុស្សស្លាប់ចំនួន ១៩នាក់ គឺនៅទីក្រុង Lucknow របស់រដ្ឋ Uttar Pradesh ដោយសារតែពួកគេឈ្លោះ ប្រកែកគ្នា រហូតកើតជាហិង្សា និង មួយចំនួនទៀតបានស្លាប់ដោយតែគ្រោះថ្នាក់ចរាចរណ៍ ដែលបង្កឡើង ដោយគ្រឿងស្រវឹង។ គួរបញ្ជាក់ថា ពិធីបុណ្យលាបពណ៌បានធ្វើឡើងទូទាំងប្រទេសឥណ្ឌា កាលពីថ្ងៃ ព្រហស្បតិ៍ ប៉ុន្តែមានតែរដ្ឋមួយប៉ុណ្ណោះ ដែលកើតគ្រោះថ្នាក់រហូតដល់មានមនុស្សបាត់បង់ជីវិតច្រើន៕