ហ្វីលីពីន: កងកម្លាំងពិសេសអាមេរិក បានចូលរួមការប្រយុទ្ធប្រឆាំង ដើម្បីកម្ទេចពួកសកម្ម ប្រយុទ្ធលាក់ខ្លួន ក្នុងទីក្រុងមួយ ស្ថិតនៅភាគខាងត្បូងប្រទេសហ្វីលីពី ខណៈដែលកងកម្លាំងរដ្ឋាភិបាល កំពុងជួបការលំបាក ក្នុងការបន្តប្រយុទ្ធឆ្ពោះ​ទៅមុខ ដោយទាហានម៉ារីនចំនួន ១៣ នាក់​ ត្រូវបានសម្លាប់ នៅក្នុងការប្រយុទ្ធគ្នាដ៏ខ្លាំង នៅតាមជាយទីក្រុងផងដែរ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១១ ខែមិថុនា ឆ្នាំ ២០១៧។

មន្ត្រីហ្វីលីពីន បាននិយាយថា យោធាអាមេរិក បានផ្តល់ជូននូវជំនួយបច្ចេកទេស ដល់កងកម្លាំងរដ្ឋាភិបាល ដើម្បីបញ្ចប់ការប្រយុទ្ធគ្នាដ៏ក្តៅគគុក ជាមួយក្រុមសម្ព័ន្ធមិត្តយុទ្ធជនរដ្ឋអ៊ីស្លាម នៅទីក្រុង Marawi អស់រយៈពេលបីសប្តាហ៍ទីមកហើយ ខណៈមិនទទួលបានផ្លែផ្កាអ្វីទ្បើយ។

អ្នកនាំពាក្យយោធាលោកវរសេនីយ៍ទោ Lieutenant Colonel Jo-Ar Herrera បានប្រាប់នៅសន្និសីទកាសែតមួយ ក្នុងទីក្រុង Marawi ថា «ពួកគេ (អាមេរិក) មិនចូលរួមប្រយុទ្ធប្រឆាំងនោះទេ។ ពួកគេគ្រាន់តែជួយផ្តល់នូវការគាំទ្រ ផ្នែកបច្ចេកទេសប៉ុណ្ណោះ»។

មន្ត្រីស្ថានទូតអាមេរិក បានបញ្ជាក់ថា ការផ្ដល់ជំនួយគាំទ្រនេះ បានធ្វើទ្បើងតាមសំណើរបស់រដ្ឋាភិបាលហ្វីលីពីន ប៉ុន្តតែមិនបានផ្ដល់ព័ត៌មានឲ្យបានលម្អិតនោះទេ។

ប្រព័ន្ធផ្សព្វផ្សាយរដ្ឋ បានឲ្យដឹងថា យន្តហោះ P3 Orion របស់សហរដ្ឋអាមេរិក បានហោះឃ្លាំមើល នៅលើទីក្រុងនោះ កាលពីថ្ងៃសុក្រ ។

គួរបញ្ជាក់ដែរថា ការប្រយុទ្ធគ្នា​នៅ​ប្រទេស​ហ្វីលីពីន ​រវាងកងកម្លាំងរដ្ឋាភិបាល និងពួក​ឧទ្ទាម​ នៅ​ទីក្រុង ​Marawi បានចាប់ផ្ដើម​កាលពី​ថ្ងៃទី២៣ ​ខែឧសភា ​កន្លងទៅ ​ហើយ​​បញ្ហា​ជម្លោះ​ប្រដាប់​អាវុធ​នេះ ​បាន​បណ្តាល​ឲ្យ​ស្លាប់​កម្លាំងយោធា​ហ្វីលីពីន​សរុប៥៨នាក់​, ​ជនស៊ីវិល​ ២០នាក់​ ​និង​ក្រុមសកម្ម​ប្រយុទ្ធ​​​រាប់រយនាក់​ទៀត ​៕