ជប៉ុន: ប្រព័ន្ធផ្សព្វផ្សាយក្នុងស្រុក បានរាយការណ៍ថា រាជទាយាទរបស់ជប៉ុន នៅថ្ងៃអង្គារ បានប្ដេជ្ញាថា នឹងលះបង់ខ្លួន ដើម្បីបំពេញតួនាទីទាំងអស់តពីព្រះចៅអធិរាជ ដែលការថ្លែងរបស់ព្រះអង្គ បានធ្វើទ្បើងនៅថ្ងៃបន្ទាប់ពីសភាបានអនុម័តច្បាប់ អនុញ្ញាតឲ្យបិតារបស់ព្រអង្គ ដាក់រាជ្យបល្ល័ង្ក។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១៤ ខែមិថុនា ឆ្នាំ២០១៧។

ការចូលនិវត្តន៍របស់ព្រះចៅអធិរាជ អាគីហ៊ីតូ បានក្លាយទៅជាការដាក់រាជ្យដំបូងបំផុត សម្រាប់សែរាជវង្សជប៉ុន ដែលមិនធ្លាប់មានក្នុងរយ:ពេល ជាងពីរសតវត្សកន្លងមកនេះ។

ប្រភពដដែរ បានបញ្ជាក់ថា រដ្ឋាភិបាលក្រុងតូក្យូ កំពុងសម្លឹងមើលការកំណត់ពេលវេលា សម្រាប់ការដាក់រាជ្យរបស់ព្រះចៅអធិរាជ នៅចុងឆ្នាំ ២០១៨ ខាងមុខ ហើយក៏នឹងត្រូវផ្ទេររាជ្យបល្ល័ង្ក Chrysanthemum ទៅឲ្យព្រះអង្គម្ចាស់ Crown Prince Naruhito មានព្រះជន្ន ៥៦ វស្សា ជាកូនប្រុសច្បងឡើងសោយរាជ្យជំនួស ព្រះចៅអធិរាជផងដែរ ។

ព្រះអង្គម្ចាស់ Crown Prince Naruhito បានថ្លែងប្រាប់អ្នកកាសែតថា «យើងចង់ផ្តល់នូវបេះដូង និងព្រលឹងរបស់យើងទាំងមូល ដើម្បីបំពេញកាតព្វកិច្ចទាំងអស់ រួមបញ្ចូលទាំងភារកិច្ចផ្លូវការ ដែលយើងបានធ្វើវាកន្លងមកពីព្រះករុណាទ្រង់ថ្លៃវិសេស»។

គួរបញ្ជាក់ដែរថា ព្រះអធិរាជអាគីហ៊ីតូ ដែលមានព្រះជន្ម ៨២ វស្សា បានសម្រេចព្រះទ័យដាក់រាជ្យបល្ល័ង្ក ដោយសារព្រះជន្ម និងបញ្ហាសុខភាព នៅក្នុងប៉ុន្មានឆ្នាំចុងក្រោយនេះ បានធ្វើឲ្យមានផលលំបាក សម្រាប់ព្រះអង្គក្នុងការបំពេញភារកិច្ចផ្លូវការ ខណ:ដែលពុំមានច្បាប់ណាមួយនៅក្នុងប្រទេស សម្រាប់ឲ្យព្រះអង្គធ្វើការដាក់រាជ្យ៕