ជីប៊ូទីៈ កិច្ចព្រមព្រៀងរបស់ប្រទេសចិន ជាមួយសាធារណរដ្ឋជីប៊ូទី (Djibouti) នឹងអនុញ្ញាតឲ្យមានវត្តមានកងទ័ពទីក្រុងប៉េកាំងដល់ទៅចំនួន ១ មឺុននាក់ នៅក្នុងប្រទេសនេះរហូតដល់ឆ្នាំ ២០២៦។ នេះបើយោងតាមសារព័ត៌មាន Aljazeera ចេញផ្សាយនៅថ្ងៃទី១៣ ខែកក្កដា ឆ្នាំ២០១៧។

នាវាផ្ទុកបុគ្គលិកកងទ័ព សម្រាប់មូលដ្ឋានយោធាបរទេស របស់ប្រទេសចិនដំបូង បានកំណត់គោលដៅ ដើម្បីចាប់ផ្តើមសាងសង់ទីតាំងយោធានៅប្រទេសជីប៊ូទី ខណៈដែលយោធាទំនើបភាវូបនីយកម្មរបស់ប្រទេសនេះ បានពង្រីកខ្លួនដល់កម្រិតសកលលោក។

ប្រព័ន្ធផ្សព្វផ្សាយរដ្ឋ បានរាយការណ៍កាលពីថ្ងៃអង្គារថា នាវាចម្បាំងជាច្រើន បានចាកចេញពីទីក្រុង Zhanjiang ភាគខាងត្បូងប្រទេសចិន ដើម្បីបង្កើតមូលដ្ឋានមួយ នៅប្រទេសជីប៊ូទី ដែលគេស្គាល់ថា ជាតំបន់ប្រជុំពាណិជ្ជកម្ម ដ៏សំខាន់នៃទ្វីបអាហ្វ្រិក។

មូលដ្ឋានយោធាចិននៅជីប៊ូទី ស្ថិតនៅភាគពាយ័ព្យ នៃមហាសមុទ្រឥណ្ឌា បានបង្កឲ្យមានការព្រួយបារម្ភ ពីសំណាក់ប្រទេសឥណ្ឌាថា សកម្មភាពនេះ នឹងពង្រីកដែនអំណាចយោធារបស់ចិនដល់សម្ព័ន្ធមិត្ត ដែលជាប្រទេសជិតខាងឥណ្ឌា ក្នុនោះរួមមានប្រទេសបង់ក្លាដេស, មីយ៉ាន់ម៉ា និងស្រីលង្កាជាដើម។

គួរបញ្ជាក់ដែរថា ចិនបានចាប់ផ្តើមសាងសង់មូលដ្ឋានខ្លួន នៅប្រទេសជីប៊ូទី កាលពីឆ្នាំមុន ដែលទីក្រុងប៉េកាំង បានអះអាងថា វាត្រូវបានប្រើដើម្បីជួយសង្គ្រោះនាវាជើងទឹក ដែលចូលរួមក្នុងបេសកកម្មថែរក្សាសន្តិភាព និងមនុស្សធម៌នៅឯតំបន់នាយសមុទ្រប្រទេសយេម៉ែន និងសូម៉ាលី៕