វៀតណាម: ព្យុះទីហ្វុងឈ្មោះថា តាឡាស បានវាយប្រហារ នៅភាគកណ្តាលខេត្ត នៃប្រទេសវៀតណាម កាលពីថ្ងៃច័ន្ទ ដោយបានសម្លាប់មនុស្ស ០៨ នាក់ ខណ:ដែល ០៤ នាក់ទៀត កំពុងបាត់ខ្លួន។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃ២០ ខែកក្កដា ឆ្នាំ២០១៧។

តាឡាស គឺជាព្យុះត្រូពិកទី ២ ហើយដែលវៀតណាមបានជួបប្រទះនៅក្នុងឆ្នាំនេះ។

យោងតាមគណ:កម្មាធិការគ្រប់គ្រង និងទប់ស្កាត់គ្រោះមហន្តរាយធម្មជាតិ បានប្រាប់ភ្នាក់ស៊ីនហួ នៅថ្ងៃព្រហស្បតិ៍នេះថា ព្យុះនេះ បានបណ្តាលឲ្យផ្ទះ ១៧៥ ខ្នង ត្រូវបានដួលរលំ និងបំផ្លាញដំបូលផ្ទះជិត ៦.២០០ ខ្នង ខណ:ដែលកប៉ាល់ និងទូកនេសាទចំនួន ៥៧ គ្រឿងត្រូវបានលិច ព្រមទាំងផ្លូវថ្នល់ និងស្ពានជាច្រើនកន្លែងរងការបំផ្លាញផងដែរ។

គួរបញ្ជាក់ដែរថា នៅឆមាសទីមួយ សម្រាប់ឆ្នាំនេះ គ្រោះមហន្តរាយធម្មជាតិ នៅក្នុងប្រទេសវៀតណាម បានសម្លាប់ ឬបណ្តាលឲ្យបាត់ខ្លួនមនុស្ស ២៧ នាក់ និង ៣០ នាក់ទៀតរងរបួស រួមទាំងបំផ្លាញផ្ទះប្រជាពលរដ្ឋ ៥.៩០០ ខ្នង និងជន់លិចដីដំណាំ ១១.៤០០ ហិកតា ដែលធ្វើឲ្យខាតបង់ទ្រព្យសម្បត្តិជាង ១៩,២ លានដុល្លារ៕