បរទេសៈ ទូរទស្សន៍ CNN បានដកស្រង់សម្តីពីសមាជិកជាន់ខ្ពស់នៃគណបក្សភៀថៃ របស់លោកស្រី យីងឡាក់ បានប្រាប់ឲ្យដឹងថា លោកស្រី យីងឡាក់ និងកូនប្រុសអាយុ ១៥ ឆ្នាំ បានភៀសខ្លួនចេញពីប្រទេស មុនពេលដែលតុលាការថៃ បានរៀបចំប្រកាសសាលក្រមមួយ ជុំវិញសំណុំរឿងនយោបាយទិញស្រូវបរាជ័យរបស់លោកស្រី។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃទី២៧ ខែសីហា ឆ្នាំ២០១៧។
ប្រភពដដែរបានបន្ថែមថា «លោកស្រី យីងឡាក់ ស៊ីណាវ៉ាត់ បានធ្វើដំណើរតាមផ្លូវគោកទៅកាន់ប្រទេសកម្ពុជា ហើយឡើងយន្តហោះបន្តទៅប្រទេសសិង្ហបុរី មុននឹងបន្តដំណើរឆ្ពោះទៅទីក្រុងឌូបៃ ដោយនៅពេលនេះ លោកស្រីកំពុងតែស្ថិតនៅទីក្រុងឌូបៃហើយ»។
ការគេចខ្លួនរបស់លោកស្រី យីងទ្បាក់ ទៅកាន់ទីក្រុងឌូបៃ ត្រូវបានគេសង្ស័យថា បានធ្វើទ្បើងតាំងពីថ្ងៃទី២៣ ខែសីហាមកម្ល៉េះ ក្នុងគោលបំណងដើម្បីជួបជុំជាមួយបងប្រុស គឺលោក ថាក់ស៊ីន ស៊ីណាវ៉ាត់ ដែលកំពុងរស់នៅទីនោះ។
សូមជំរាបថា កាលពីថ្ងៃសុក្រទី២៥ ខែសីហានេះ គឺជាថ្ងៃដែលលោកស្រី យីងឡាក់ ត្រូវចូលបង្ហាញខ្លួននៅចំពោះមុខតុលាការកំពូលថៃ ដើម្បីរង់ចាំស្តាប់ការប្រកាសសាលក្រម ពាក់ព័ន្ធនឹងសំណុំរឿងនយោបាយទិញស្រូវបរាជ័យរបស់លោកស្រី ប៉ុន្តែអតីតមេដឹកនាំថៃរូបនេះ មិនបានបង្ហាញខ្លួនឡើយ ដោយមេធាវីរបស់លោកស្រីបានញ្ជាក់ថា លោកស្រីមានបញ្ហាសុខភាព៕
មតិយោបល់