ថៃៈ យន្ដហោះក្រុមហ៊ុនអាកាសចរណ៍ Jetstar Airways មួយគឿង ដែលមានដឹកអ្នកដំណើរជាង ១៨០ នាក់ នៅថ្ងៃច័ន្ទនេះ ត្រូវបានបង្ខំចិត្តចុះចតភ្លាមៗ នៅព្រលានយន្តហោះអន្តរជាតិឈៀងម៉ៃ ភាគខាងជើងប្រទេសថៃ។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃ០២ ខែតុលា ឆ្នាំ២០១៧។

ពាក់ព័ន្ធនឹងបញ្ហានេះ ខាងព្រលានយន្តហោះ បានទទួលរបាយការណ៍អាសន្នមួយ នៅម៉ោង ១១ និង ៣០ នាទីព្រឹក (ម៉ោងក្នុងស្រុក) បន្ទាប់ពីយន្ដហោះខាងលើ បានចុះចតដោយសុវត្ថិភាព និងពុំមាននរណាម្នាក់រងរបួស ឬការខូចខាតអ្វីទ្បើយ។

ព័ត៌មានផ្លូវការមួយ បានឲ្យដឹងថា គឺមានផ្សែងហុយចេញពីបន្ទប់ដាក់ឥវ៉ាន់នៃយន្ដហោះនោះ ដែលជាហេតុនាំឲ្យយន្តហោះ ត្រូវបង្ខំចុះចតយ៉ាងបន្ទាន់បែបនេះ៕