អាហ្វហ្គានីស្ថាន: ក្រសួងការពារជាតិក្នុងប្រទេស នៅព្រឹកថ្ងៃសុក្រនេះ បាននិយាយថា សកម្មប្រយុទ្ធសរុបចំនួន ៩៥នាក់ ត្រូវបានសម្លាប់ នៅក្នុងប្រតិបត្តិការបោសសម្អាតពួកភេរវករ ពីសំណាក់យោធាអាហ្វហ្គានីស្ថាន នៅទូទាំងប្រទេស។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃទី២៧ ខែតុលា ឆ្នាំ២០១៧។

កងកម្លាំងសន្តិសុខ និងការពារជាតិអាហ្វហ្គានីស្ថាន (ANDSF) បានចាប់ផ្តើមប្រតិបត្តិការរយ:ពេល ២៤ ម៉ោង ដើម្បីវាយកម្ទេចពួកភេរវករ និងសត្រូវដែលបង្កអស្ថិរភាព នៅតំបន់មួយចំនួនក្នុងប្រទេស ដែលជាលទ្ធផលក្រៅពីសម្លាប់ ក៏មានភេរវករ ៨ នាក់បានរងរបួស និង ១១នាក់ទៀត ត្រូវចាប់ខ្លួនផងដែរ។

តាមសេចក្តីថ្លែងការណ៍របស់ក្រសួង បានឲ្យដឹងថា កងកម្លាំងអាកាសនៃប្រទេស បានធ្វើការហោះហើរចំនួន ១១០ លើក ដើម្បីគាំទ្រដល់កងកម្លាំងជើងគោក អំឡុងការវាយឆ្មក់នៅខេត្តចំនួន ១២ ដោយបានរឹបអូសយកអាវុធ និងគ្រាប់រំសេវជាច្រើន ពីពួកសកម្មប្រយុទ្ធ។

គួររំឭកថា អំពើហឹង្សាដឹកនាំដោយពួកឧទ្ទាមតាលីបង់ នៅតែបន្តកើតមានក្នុងប្រទេសអាហ្វហ្គានីស្ថាន ខណ:ដែលប្រតិបត្តិបង្ក្រាបដោយកងកម្លាំងសន្ដិសុខ បានធ្វើទ្បើងឥតឈប់ឈរផងដែរ៕