បរទេសៈ តាមអាជ្ញាធរប្រទេសអ៊ីរ៉ង់ និងអ៊ីរ៉ាក់ បាននិយាយថា គ្រោះរញ្ជួយដីដ៏ខ្លាំងក្លាមួយ បានវាយប្រហារនៅតំបន់ព្រំដែន នៃប្រទេសទាំងពីរ កាលពីថ្ងៃអាទិត្យ បានសម្លាប់មនុស្សយ៉ាងហោចណាស់ ៦៧នាក់។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១៣ ខែវិច្ឆិកា ឆ្នាំ២០១៧។

ប្រភពពីទូរទស្សន៍រដ្ឋ បានរាយការណ៍ថា មនុស្សប្រហែល ៣០០ នាក់បានរងរបួស បន្ទាប់ពីមានគ្រោះរញ្ជួយដីនៅក្នុងខេត្ត Kermanshah របស់អ៊ីរ៉ង់ ស្ថិតនៅជិតព្រំដែនប្រទេសអ៊ីរ៉ាក់ ។

ពាក់ព័ន្ធនឹងករណីនេះដែរ មន្រ្តីភ្នាក់ងារគ្រាអាសន្ន បានឲ្យដឹងថា ជនរងគ្រោះភាគច្រើន គឺស្ថិតនៅទីប្រជុំជន Sarpol-e Zahab ចម្ងាយប្រហែល ១៥ គីឡូម៉ែត្រពីតំបន់ព្រំដែន។

យោងតាមទីតាំងអង្កេតការភូមិសាស្ត្ររបស់អាមេរិក បាននិយាយថា រញ្ជួយដីនេះ មានកម្រិត ៧,៣ រ៉ិចទ័រ បានវាយប្រហារនៅចំណុចកណ្ដាល ចម្ងាយ ៣០ គីឡូម៉ែត្រពីភាគនិរតីនៃទីក្រុង Halabja របស់ប្រទេសអ៊ីរ៉ាក់ ជិតនិងព្រំដែនភាគឥសាន្តជាមួយអ៊ីរ៉ង់៕