ជប៉ុន: ក្រសួងការបរទេសហ្វីលីពីន បាននិយាយនៅថ្ងៃអង្គារ៍នេះថា រដ្ឋមន្រ្តី​ការបរ​ទេសជប៉ុនលោក Fumio Kishida នឹងចាប់ផ្តើមធ្វើដំណើរទៅកាន់ប្រទេសហ្វីលីពីន ក្នុង​គោលំណងដើម្បីជួបលោកប្រធានាធិបតីហ្វីលីពីន លោក Rodrigo Duterte នៅទីក្រុង Davao នៅ​ថ្ងៃ​ព្រហស្បតិ៍ខានស្អែក គ្រាដែលអតីតប្រធានាធិបតីចាស់លោក Ramos បានធ្វើដំណើរទៅដល់ចិន ដើម្បី​ស្តារ​ចំណងមិត្តភាពឡើងវិញ។ នេះបើយោងតាមការចេញផ្សាយដោយសារព័ត៌មានចិនស៊ិនហួ នៅយប់​ថ្ងៃទី៩ សីហា ឆ្នាំ២០១៦។

រដ្ឋមន្ត្រីក្រសួងការបរទេសជប៉ុនបានឱ្យដឹងនៅក្នុងសេចក្តីថ្លែងការណ៍មួយថា លោក Kishida នឹងធ្វើ​ដំណើរ​ទស្សនកិច្ចជាផ្លូវការ ទៅកាន់ប្រទេសហ្វីលីពីន ចាប់ពីថ្ងៃទី១០ ដល់ថ្ងៃទី១២។ សេចក្តីថ្លែង​ការណ៍​នេះ មិនបាននិយាយអំពីបញ្ហា ដែលលោក Duterte និងលោក Kishida នឹងពិភាក្សាក្នុងអំឡុង​កិច្ចប្រជុំ​របស់ពួកគេនោះទេ ប៉ុន្តែគ្រាន់តែគេអាចសន្និដ្ឋានបានថា ក្រោយពីរដ្ឋាភិបាលជប៉ុននិងរដ្ឋាភិបាលចិន មាន​ភាពតានតឹងនៅក្នុងជម្លោះដែនទឹកសមុទ្រចិនខាងកើត ស្របពេលដែលរដ្ឋាភិបាលហ្វីលីពីន​និងរដ្ឋាភិបាល​ចិន កំពុងតែមានជម្លោះរឿងសមុទ្រចិនខាងត្បូង ដែលសាលាក្តីអាជ្ញាកណ្តាល​ដែលមានមូលដ្ឋាន​នៅទីក្រុង​ឡា​អេ បានកាត់ក្តីឲ្យហ្វីលីពីនឈ្នះចិន។

សេចក្តីថ្លែងការណ៍ដដែលនេះ បានបន្តឲ្យដឹងថា «លោក Kishida នឹងធ្វើដំណើរទស្សនកិច្ចជាលើកដំបូង​របស់គាត់ បន្ទាប់ពីការតែងតាំងសាជាថ្មី ជារដ្ឋមន្រ្តីការបរទេសប្រទេសជប៉ុន បន្ទាប់ពីការរុះរើគណៈរដ្ឋមន្ត្រី​នៅថ្ងៃទី០៣ ប្រទេសហ្វីលីពីន​ គឺជាប្រទេសដែលលោកបានមកធ្វើទស្សនកិច្ចលើកដំបូងរបស់ខ្លួន បន្ទាប់​ពី​ការតែងតាំងរដ្ឋមន្រ្តីក្រសួងការបរទេសប្រទេសជប៉ុន ក្នុងឆ្នាំ២០១២»។

នៅឆ្នាំ២០១៥ ជប៉ុននិងហ្វីលីពីន បានចុះហត្ថលេខាលើសេចក្តីប្រកាសរួម ដែលជាដៃគូយុទ្ធសាស្ដ្រ​សម្រាប់​ជំរុញការពង្រឹងគោលការណ៍ ដែលបានចែករំលែកនិងគោលដៅសន្តិភាព, សន្តិសុខនិងកំណើន​ក្នុងតំបន់​និង​ក្រៅតំបន់។

កាលពីខែមុន រដ្ឋមន្ត្រីក្រសួងការបរទេសសហរដ្ឋអាមេរិកលោក John Kerry បានចូលសំដែងការគួរសម​ជា​មួយ​លោក Duterte នៅឯវិមានប្រធានាធិបតី Malacanang ក្នុងទីក្រុងម៉ានីលផងដែរ៕