ភ្នំពេញៈ បុរស២នាក់ បើកម៉ូតូXR ក្នុងល្បឿនលឿន បុកបុរស២នាក់ទៀតកំពុងជិះម៉ូតូស្មាស់ទិសដៅបញ្ច្រាសគ្នាពេញទំហឹង បណ្តាលឲ្យបុរសទាំង៤នាក់រងរបួសធ្ងន់ ។

ហេតុការណ៍នេះកើតឡើងកាលពីវេលាម៉ោង ១០និង៤០នាទីយប់ ថ្ងៃទី១២ ខែវិច្ឆិកា ឆ្នាំ២០១៧ ស្ថិតនៅតាមបណ្តោយផ្លូវ ២០១១ សង្កាត់ គោកឃ្លាង ខណ្ឌសែនសុខ រាជធានីភ្នំពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញម៉ូតូស្មាស់រ៉េវូ ស៊េរីឆ្នាំ២០០៩ ពណ៌ខ្មៅ ពាក់ស្លាកលេខ ពោធិ៍សាត់ 1B-1765 បើកបរដោយបុរស២នាក់ទិសដៅពីជើងទៅត្បូងតាមបណ្តោយផ្លូវ២០១១ ស្រាប់តែមានបុរស២នាក់ទៀតបើកម៉ូតូម៉ាកXR ពណ៌លឿង ពាក់ស្លាកលេខ ភ្នំពេញ 1AN-5959 បើកបរទិសដៅពីត្បូងទៅជើង ក្នុងល្បឿនលឿន លុះមកដល់ចំណុចកើតហេតុបុកគ្នាពេញទំហឹង បណ្តាលឲ្យបុរស៤នាក់រងរបួសធ្ងន់។ចំណែកឯម៉ូតូវិញរងការខូចខាតយ៉ាងដំណំទាំងសងខាង ។

ក្រោយពេលកើតហេតុសមត្ថកិច្ចមូលដ្ឋានបានចុះមកដល់ទាក់ទងទៅសមត្ថកិច្ចជំនាញឲ្យមកវាស់វែងនឹងយកម៉ូតូទាំង២គ្រឿងយកទៅរក្សាទុកនៅការិយាល័យចរាចរណ៍ផ្លូវគោកខណ្ឌសែនសុខ ដើម្បីរង់ចាំការដោះស្រាយទៅតាមនិតិវិធីច្បាប់ ៕