កូរ៉េ: ប្រធានាធិបតីកូរ៉េខាងត្បូង លោក មូន ជេអ៊ីន បានសម្តែងការត្រៀមលក្ខណ:រួចជាស្រេច ដើម្បីជួបមេដឹកនាំកំពូលកូរ៉េខាងជើង គឺលោក គីម ជុងអ៊ុន ដោយនិយាយថា លក្ខខណ្ឌមួយចំនួនត្រូវតែជួបពិភាក្សាគ្នា ដើម្បីអាចដោះស្រាយបញ្ហានុយក្លេអ៊ែរ ជាមួយកូរ៉េខាងជើង។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី១០ ខែមករា ឆ្នាំ២០១៨។

ថ្លែងនៅក្នុងសន្និសីទសារព័ត៌មានប្រចាំឆ្នាំរបស់ខ្លួន លោក មូន បាននិយាយថា លោកបានត្រៀមខ្លួនរួចជាស្រេច ដើម្បីជួបមេដឹកនាំកូរ៉េខាងជើង លោក គីម ប៉ុន្តែក៏ត្រូវចាំមើលឲ្យមានលក្ខខណ្ឌ ដែលត្រូវជួបផងដែរ ដោយក្នុងនោះមេដឹកនាំកូរ៉េខាងត្បូង បានបន្ថែមថា បញ្ហានុយក្លេអ៊ែររបស់កូរ៉េខាងជើង ត្រូវតែមានការដោះស្រាយ។

សូមជំរាបថា កាលពីរដូវក្តៅកន្លងទៅ ក្នុងអំឡុងពេលថ្លែងសុន្ទរកថា នៅទីក្រុងប៊ែរឡាំង លោក មូន ជេអ៊ីន បាននិយាយថា ទំនាក់ទំនងជាមួយមេដឹកនាំកូរ៉េខាងជើង គឺពិតជាចាំបាច់ណាស់ ហើយកិច្ចប្រជុំកំពូលរវាងប្រទេសទាំងពីរ នឹងត្រូវធ្វើឡើង ប្រសិនបើវាជួយបន្ធូរភាពតានតឹង និងការប្រឈមមុខដាក់គ្នា៕