ថៃៈ ពលរដ្ឋសញ្ជាតិមីយ៉ាន់ម៉ា ១៣ នាក់ និងអ្នកបើកបរជនជាតិថៃម្នាក់ ត្រូវបានស្លាប់ បន្ទាប់ពីជាប់នៅខាងក្នុងរថយន្ដ ដែលបានឆាបឆេះ ដោយសារគ្រោះថ្នាក់រថយន្តពីរគ្រឿង ប៉ះទង្គិចគ្នានៅស្រុក Muang នៅព្រឹកថ្ងៃសុក្រនេះ។ នេះបើយោងតាមសារព័ត៌មាន Bangkok Post ចេញផ្សាយនៅថ្ងៃទី២៤ ខែវិច្ឆិកា ឆ្នាំ២០១៧។

តាមប៉ូលិសបានឲ្យដឹងថា គ្រោះថ្នាក់នេះ បានកើតទ្បើងនៅលើផ្លូវហាយវេ Asian នៅពេលដែលរថយន្ត បានធ្វើដំណើរទៅដល់ទីក្រុងបាងកក នៅវេលាម៉ោង ២ និង៣០នាទីទៀបភ្លឺ។

ខណៈមកដល់ចំណុចកើតហេតុ រថយន្តដឹកទំនិញធុនស្រាល បានបើកបុកពីក្រោយគូទរថយន្តដឹកអង្ករ ដែលបានចតនៅចំកណ្តាលផ្លូវ បណ្ដាលឲ្យឆាប់ឆេះអណ្ដាតភ្លើងទ្បើង។

ពាក់ព័ន្ធនឹងករណីនេះ ក្រុមកអ្នកជួយសង្គ្រោះ បាននិយាយថា សាកសពជនរងគ្រោះចំនួន ១៤ ត្រូវរកឃើញនៅក្នុងរថយន្តដឹកទំនិញ ដែលមានឈ្មោះក្រុមហ៊ុន Boon Ruean Tour Co Ltd ៕