Post News Media ព័ត៌មានអន្តរជាតិ លោក គីម ជុង​អ...

លោក គីម ជុង​អ៊ុន ចេញដំណើរ​មក​​ទៅ​សិង្ហ​បុរី​ សម្រាប់ជំនួបកំពូលជាមួយលោក ត្រាំ

កូរ៉េ: ទីភ្នាក់ងារសារព័ត៌មាន​យ៉ុ​ន​ហាប់ បានឲ្យដឹងថា មេដឹកនាំ​កូរ៉េខាងជើង​លោក ​គីម ជុង​អ៊ុន​បាន​ដំណើរទៅប្រទេសសិង្ហបុរី តាម​យន្តហោះ Boeing 747 ​របស់​ក្រុមហ៊ុន​​ឯកជន​ចិន ​ដែល​ធ្លាប់​ផ្តល់​សេវា​សម្រាប់​មន្ត្រី​ថ្នាក់ខ្ពស់​ចិន។​ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១០ ខែមិថុនា ឆ្នាំ២០១៨។

ដោយយន្តហោះ​នេះ ​ត្រូវបាន​គេ​តាមដានការ​ចាក​ចេញពី​អាកាសយានដ្ឋាន ​នៅ​ក្រុង​ព្យុងយ៉ាង​​ នា​ម៉ោង​៨​កន្លះ​ព្រឹក​ថ្ងៃអាទិត្យ​នេះ ប៉ុន្តែមិនបាន​បញ្ជាក់​អំពី​ទិសដៅ​នៃ​យន្តហោះ​ខាងលើនោះ​ទេ​។​

​ក្នុងពេល​ជាមួយគ្នានេះ ប្រធានាធិបតី​អាមេរិក លោក ​ដូ​ណា​ល់ ត្រាំ ក៏បាន​ចាក​ចេញពី​ជំនួប​នៅ​កាណាដា ​មកកាន់​សិង្ហ​បុរី​ផងដែរ ហើយ​រំពឹងថា នឹង​ជួបប្រជុំ​ជាមួយ​គីម​នៅ​ថ្ងៃ​​អង្គារ​សប្តាហ៍ក្រោយ។​

ប្រភពពីមន្ត្រី​កងកម្លាំង​អាកាស​កូរ៉េខាងត្បូង​ម្នាក់ ​បាន​ឲ្យដឹង​ថា យន្តហោះ​ប្រដេញ​ចិន ​នឹង​អម​ការពារ​យន្តហោះ​រប​ស់មេ​ដឹកនាំ​កូរ៉េខាងជើង​ ក្នុង​ដំណើរ​​មក​ចូលរួម​ កិច្ច​ប្រជុំកំពូល​នៅ​សិង្ហ​បុរីនេះ​៕