Post News Media ព័ត៌មានអន្តរជាតិ សមយុទ្ធយោធាដ៏...

សមយុទ្ធយោធាដ៏ធំរបស់រុស្ស៊ី គឺជាការបង្ហាញថាកងទ័ពខ្លួន អាចទប់ទល់នឹងការគំរាមកំហែងនានា

រុស្ស៊ី: នៅថ្ងៃព្រហស្បតិ៍នេះ ប្រធានាធិបតីរុស្ស៊ីលោក វ្លាឌីមៀ ពូទីន បានទៅដល់តំបន់ធ្វើសមយុទ្ធ Tsugol ក្នុងដែនដី Zabaikalsky របស់រុស្ស៊ី ដើម្បីចូលរួមក្នុងដំណាក់កាលហ្វឹកហ្វឺនដ៏សំខាន់មួយ នៃសមយុទ្ធ Vostok-2018 ។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី១៣ ខែកញ្ញា ឆ្នាំ២០១៨។

Vostok-2018 ជាសមយុទ្ធយោធាទ្រង់ទ្រាយធំបំផុត ដែលបានធ្វើទ្បើងដោយរុស្ស៊ី មិនធ្លាប់មានក្នុងរយ:ពេលជាង ៣០ ឆ្នាំកន្លងមក ដោយវាបានចាប់ផ្ដើមតាំងពីថ្ងៃទី ១១ រហូតដល់ថ្ងៃទី ១៧ ខែកញ្ញាខាងមុខ នៅភាគខាងកើតនៃប្រទេសរុស្ស៊ី និងនៅក្នុងដែនទឹកនៃសមុទ្រជប៉ុន, សមុទ្រ Bering និង Okhotsk ។

សមយុទ្ធយោធាដ៏ធំមួយនេះ បានកើតមានឡើងចំពេលមានភាពតានតឹង រវាងលោកខាងលិច និងរុស្ស៊ីក្នុងកម្រិតខ្ពស់បំផុត មិនធ្លាប់មានចាប់តាំងពីសម័យសហភាពសូវៀតមក។ សមយុទ្ធនេះ ក៏ត្រូវបានថ្កោលទោសពីសំណាក់ណាតូផងដែរថា វាជាការហ្វឹកហ្វឺនកងកម្លាំង សម្រាប់ជម្លោះទ្រង់ទ្រាយធំមួយ។

យោងតាមក្រសួងការពារជាតិរុស្ស៊ី បានឲ្យដឹងថា សមយុទ្ធ Vostok-2018 នេះមានការចូលរួមពីទាហានរុស្ស៊ីជាង ៣០០,០០០ នាក់ រថក្រោះ ៣៦,០០០ គ្រឿង យន្តហោះចម្បាំង ១,០០០គ្រឿង និងនាវាចម្បាំង ៨០ គ្រឿង ក្នុងក៏មានការចូលរួមពីទាហានចិន និងម៉ុងហ្គោលីផងដែរ។

ពាក់ព័ន្ធនឹងសមយុទ្ធនេះ លោក ពូទីន បានបញ្ជាក់ថា រុស្ស៊ី គឺជារដ្ឋសន្តិភាព អាស្រ័យហេតុនេះ យើងមិនមានផែនការណាមួយ ដើម្បីឈ្លានពានបរទេសនោះទេ។

ដោយលោកអះអាងថា កងទ័ពរុស្ស៊ី ត្រូវតែត្រៀមខ្លួន ដើម្បីការពារអធិបតេយ្យភាព និងសន្តិសុខជាតិ ក៏ដូចជាគាំទ្រសម្ព័ន្ធមិត្តរបស់ប្រទេស ក្នុងករណីប្រសិនបើចាំបាច់៕