អ៊ីតាលី: នាយករដ្ឋមន្រ្តីអ៊ីតាលីលោក Matteo Renzi បានឲ្យដឹងថា ចៅក្រមអ៊ីតាលី កំពុងធ្វើការងាររបស់ ពួកគេស្របតាមរដ្ឋធម្មនុញ្ញ ដើម្បីធ្វើការស៊ើបអង្កេតកូនប្រុសប្រធានាធិបតីតួកគី លោក Recep Tayyip Erdogan លើករណីលាងលុយកង្វក់។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី៣ ខែសីហា ឆ្នាំ ២០១៦។

សម្ដីរបស់លោក Renzi នេះ បានលើកឡើង បន្ទាប់ពីប្រធានាធិបតីតួកគី លោក Erdogan បាននិយាយថា ការស៊ើបអង្កេតករណីលាងលុយកង្វក់ លើកូនប្រុសរបស់លោក នឹងប៉ះពាល់ដល់ទំនាក់ទំនងទ្វេភាគី។

ទីភ្នាក់ងារព័ត៌មាន ANSA បានដកស្រង់សម្ដីលោក Renziថា «ក្នុងប្រទេសអ៊ីតាលីយើង មានស្វយ័ត និងប្រព័ន្ធតុលាការឯករាជ្យមួយ ដោយដើរតួនាទីតាមច្បាប់ និងប្រឆាំងគ្រប់ទម្រង់ទាំងអស់ ទាក់ទងនឹងបទល្មើសណាផ្ទុយពីច្បាប់» ។

ចៅក្រមបានឆ្លើយទៅនឹងប្រធានាធិបតីតួកគីថា «រដ្ឋធម្មនុញ្ញអ៊ីតាលី និងមិនដូចនៅតួកគីនោះទេ។ យើងហៅប្រព័ន្ធនេះ ជានីតិរដ្ឋ ហើយយើងពិតជាជឿជាក់ចំពោះវា»។

គួរបញ្ជាក់ដែរថា កូនប្រុសប្រធានាធិបតីតួគី ឈ្មោះលោក Bilal អាយុ ៣៥ឆ្នាំ បានស្ថិតនៅក្រោម ការស៊ើបអង្កេតរបស់តុលាការអ៊ីតាលី ពាក់ព័ន្ធនឹងករណីលាងលុយកង្វក់៕