ជប៉ុន: ប្រព័ន្ធផ្សព្វផ្សាយជប៉ុនមួយ នៅថ្ងៃច័ន្ទនេះ បាននិយាយថា រដ្ឋាភិបាលក្រុងតូក្យូ បានធ្វើសមយុទ្ធនាវាមុជទឹក លើកដំបូងរបស់ខ្លួន នៅសមុទ្រចិនខាងត្បូង ដែលវាជាការផ្លាស់ប្តូរមួយ ទំនងជានឹងបង្កហេតុដល់ទីក្រុងប៉េកាំង ដែលធ្លាប់បានអះអាងថា ភាគច្រើននៃតំបន់ដែនទឹក ដែលកំពុងមានជម្លោះជាមួយជប៉ុន គឺជារបស់ពួកគេ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១៧ ខែកញ្ញា ឆ្នាំ២០១៨។

កាសែតក្នុងស្រុក Asahi Shimbun បានឲ្យដឹងថា នាវាមុជទឹក Kuroshio កាលពីថ្ងៃព្រហស្បតិ៍ បានចូលរួមសមយុទ្ធ ជាមួយនាវាចម្បាំងជប៉ុន ៣ គ្រឿង នៅដែនទឹកស្ថិតនៅភាគនិរតីនៃតំបន់ Scarborough Shoal ដែលគ្រប់គ្រងដោយប្រទេសចិន។

ខណ:ដែលក្រុងប៉េកាំងបានអះអាងថា ភាគច្រើននៃធនធានដ៏សម្បូរ នៅសមុទ្រចិនខាងត្បូង គឺមានការធ្វើពាណិជ្ជកម្មពីសំណាក់រដ្ឋាភិបាលខ្លួន ឆ្លងកាត់នៅទីនោះជារៀងរាល់ឆ្នាំ ក្នុងទំហំទឹកប្រាក់ចំនួន ៥ពាន់ពាន់លានដុល្លារឯណ្ណោះ បើទោះបីជាមានការអះអាងពីប្រទេសប្រ៊ុយណេ ម៉ាឡេស៊ី ហ្វីលីពីន តៃវ៉ាន់ និងវៀតណាមថាជាដែនទឹករបស់ពួកគេក៏ដោយ។

សូមជំរាបថា ភាពតានតឹងកាន់តែខ្លាំងឡើងនៅតំបន់ Scarborough Shoal ចាប់តាំងពីទីតាំងនោះ ត្រូវបានក្រុងប៉េកាំងរឹបអូសយកមកគ្រប់គ្រង ពីទីក្រុងម៉ានីល កាលពីឆ្នាំ ២០១២កន្លងមក៕