កាណាដា: តុលាការប្រទេសកាណាដា កាលពីថ្ងៃអង្គារ បានសម្រេចឲ្យមានការដាក់ប្រាក់ធានា ដើម្បីដោះលែងប្រធានហិរញ្ញវត្ថុក្រុមហ៊ុន Huawei ខណ:ដែលលោកស្រី កំពុងរងចាំសវនាការសម្រាប់ការធ្វើបត្យាប័នទៅកាន់សហរដ្ឋអាមេរិក ដែលជាសកម្មភាពមួយ បានធ្វើឲ្យចិន មានការខឹងសម្បារ ចំពោះការចាប់ខ្លួននេះ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១២ ខែធ្នូ ឆ្នាំ២០១៨។

លោកស្រី Meng Wanzhou អាយុ ៤៦ ឆ្នាំ ដែលគេស្គាល់ថា ជាប្រធានផ្នែកហិរញ្ញវត្ថុ និងជាកូនស្រីរបស់ស្ថាបនិកក្រុមហ៊ុន Huawei បានប្រឈមមុខនឹងការចោទប្រកាន់របស់អាមេរិកថា លោកស្រីបានរំលោភបំពាន​លើទណ្ឌកម្មអាមេរិក​ ប្រឆាំង​នឹងប្រទេសអ៊ីរ៉ង់។

ទាក់ទងនឹងរឿងក្ដីរបស់លោកស្រី ចៅក្រមលោក William Ehrcke នៅឯសវនាការក្នុងតុលាការក្រុង Vancouver រដ្ឋ British Columbia កាលពីថ្ងៃអង្គារ បានផ្តល់ឲ្យមានការដាក់ប្រាក់ធានាចំនួន ៧.៥ លានដុល្លារអាមេរិក និងលក្ខខណ្ឌផ្សេងទៀតផងដែរ ដើម្បីដោះលោកស្រី Meng។

ពាក់ព័ន្ធនឹងបញ្ហានេះ រដ្ឋាភិបាលចិន បានធ្វើការគំរាមយ៉ាងធ្ងន់ធ្ងរ អំពីផលវិបាក ហើយទាមទារឲ្យប្រទេសកាណាដា ដោះលែងលោកស្រី Meng ភ្លាមៗ៕