អេក្វាទ័រ: ក្រសួងសុខាភិបាលសាធារណ: កាលពីថ្ងៃព្រហស្បតិ៍ បានចេញផ្សាយតួលេខចុងក្រោយថា មកទល់ពេលនេះ អេក្វាទ័រមានមនុស្ស ៧៤ នាក់ហើយ បានស្លាប់ និង ៦៩១ ករណីបន្ថែមទៀតនៃមេរោគ ជំងឺគ្រុនផ្តាសាយ AH1N1 ក្នុងឆ្នាំ ២០១៦។ នេះបើយោងតាមរយ: សារព័ត៌មានចិនស៊ិនហួរ ចេញផ្សាយនៅថ្ងៃទី៨ ខែកក្កដា ឆ្នាំ២០១៦។

ចំនួននៃជនរងគ្រោះនេះ គឺនៅតែទាបជាងរយ:ពេលដូចគ្នាក្នុងឆ្នាំ ២០១៣ នៅពេលដែលការរីករាលដាល មេរោគ AH1N1 បានបណ្ដាលឲ្យមនុស្ស ១១៤ នាក់បានស្លាប់។

ក្នុងឆ្នាំនេះ ការរីករាលដាលនៃមេរោគនេះ ត្រូវបានគេកត់សម្គាល់ឃើញថា ជំងឺផ្ដាសាយជ្រូក បានសម្លាប់ជីវិតមនុស្សដល់ ១១ ភាគរយក្នុងបញ្ជីឈ្មោះនៃជំងឺ។

មេរោគនេះ ជាធម្មតាវាយប្រហារផ្លូវដង្ហើម និងបណ្តាលឲ្យគ្រុនក្តៅ ឈឺក្បាល ឆ្អឹង និងសាច់ដុំ ព្រមទាំងក្អកខ្លាំង។

ជាមួយនឹងការរីករាលដាលនៃជំងឺនេះ បានកើនឡើងជាថ្មីម្តងទៀត ក្រសួងបានហាមឃាត់មិនឲ្យបើកលក់ថ្នាំ ប្រឆាំងជំងឺផ្តាសាយទេ នៅឯឱសថស្ថានក្នុងខែឧសភា ដើម្បីការពារការប្រើថ្នាំលេបព្យាបាលដោយខ្លួនឯង ព្រោះរោគសញ្ញាវា ដូចទៅនឹងជំងឺផ្តាសាយ៕