ម៉ាទ្បេស៊ី: បើតាមឆ្មាំសមុទ្ររបស់ប្រទេស បានឲ្យដឹងកាលពីថ្ងៃច័ន្ទនេះថា ពួកគេបានរកឃើញសាកសព ១៤ នាក់ បន្ទាប់ពីទូកមួយ បានលិចនៅភាគខាងត្បូងរដ្ឋ Johor ខណ:ដែលមនុស្ស ១២ នាក់ទៀតកំពុងបាត់ ខ្លួន។ នេះបើយោងតាមរយ: សារព័ត៌មានចិនសិង្ហបុរី ចេញផ្សាយនៅថ្ងៃទី២៥ ខែកក្កដា ឆ្នាំ២០១៦។

ប្រព័ន្ធផ្សព្វផ្សាយក្នុងស្រុក រាយការណ៍មកថា ទូកនេះដឹកមនុស្សចំនួន ៦២ នាក់ ដែលពួកគេទាំងអស់ ជាជនអន្តោប្រវេសន៍ខុសច្បាប់ឥណ្ឌូនេស៊ី ហើយដោយសាររលកខ្លាំង ទើបបណ្ដាលឲ្យទូករបស់ពួកគេ ត្រូវក្រទ្បាប់កាលពីថ្ងៃសៅរ៌។

ហេតុការណ៍នេះ បានកើតទ្បើងនៅម៉ោង ៣ល្ងាច (ម៉ោងក្នុងស្រុក) ហើយមកទល់ពេនេះ អ្នកដំណើរ ៣៤ នាក់ ត្រូវបានជួយគេសង្គ្រោះ ក្នុងនោះរួមមានស្ត្រី ៨នាក់ និង ២៦នាក់ទៀតជាបុរស៕