ថៃៈ ពូជពង្សវង្សត្រកូលមេក្លោងគ្រឿងញៀនមួយសម្បុក មានគ្នាចំនួន១៥នាក់ ដែលកំពុងរស់នៅសោយសុខ ក្នុងភាគខាងជើងនៃប្រទេសថៃ ត្រូវបានសមត្ថកិច្ចជំនាញធ្វើការឡោមព័ទ្ធ ដោយក្រសោបបានទាំងអស់ ព្រមទាំងរឹបអូសគ្រឿងញៀនប្រភេទម៉ាទឹកកកទម្ងន់ ២០គីឡូក្រាម និងលុយចំនួន១១លានបាត រួមនឹងអាវុធគ្រប់ប្រភេទជាង១០ដើមផងដែរ។

ប្រតិបត្តិការឆ្មក់ចាប់ខាងលើនេះ ធ្វើឡើងកាលពីវេលាម៉ោង២រសៀលថ្ងៃទី១១ ខែតុលា ឆ្នាំ២០១៦ ដោយកម្លាំងនាយកដ្ឋានតម្រួតប្រឆាំងគ្រឿងញៀន ដែលដឹកនាំដោយលោក ផនឆៃ ចំរើនវង់ សហការជាមួយកម្លាំងតម្រួតព្រំដែនលេខ៣៣៤ សរុបចំនួន២០០នាក់ បានចេញប្រតិបត្តិការទៅកាន់ព្រំដែនភាគខាងជើងនៃប្រទេសថៃ គឺស្ថិតត្រង់ចំណុចស្ថានីយប្រេងឥន្ធនៈកាល់តិចក្នុងភូមិ១២ ឃុំថាតន ស្រុកម៉ែអាយ ខេត្តឈៀងម៉ៃ ប្រទេសថៃ ហើយបិទច្រកចេញចូលទាំងអស់ និងធ្វើការឡោមព័ទ្ធលំនៅដ្ឋានមួយកន្លែងជាកម្មសិទ្ធរបស់ត្រកូល ឡៅតា សែនលី ដែលជាស្តេចក្រាញ់រកស៊ីគ្រឿងញៀនដ៏ធំនៅក្នុងប្រទេសថៃ។

ក្នុងកិច្ចប្រតិបត្តិការនោះ កម្លាំងជំនាញនៃនាយកដ្ឋានតម្រួតប្រឆាំងគ្រឿងញៀនបានធ្វើការឃាត់ខ្លួនមនុស្សចំនួន១៥នាក់ ដែលជាសាច់ញាតិ និងវង្សត្រកូលនៃក្រុមរកស៊ីជួញដូរគ្រឿងញៀនឆ្លងដែន ព្រមទាំងដកហូតវត្ថុតាងដូចបានរៀបរាប់ខាងលើ។

លោក ផនឆៃ ចំរើនវង់ បានលើកឡើងថា ក្នុងកិច្ចប្រតិបត្តិការនេះ សមត្ថកិច្ចត្រូវការរកមុខជនសង្ស័យដែលសំខាន់ជាងគេ គឺ ១ឈ្មោះ ឡៅតា សែនលី ២ឈ្មោះ វិចាន សែនលី និង៣ ត្រូវជាប្អូនប្រុសឈ្មោះ ឡៅតា ដែលជនទាំង៣នាក់នេះ គឺជាមនុស្សសំខាន់ដែលកម្លាំងរបស់លោកបានរៀបចំផែនការចាប់ខ្លួនអស់រយៈពេល២ឆ្នាំមកហើយ ដោយទើបតែពេលនេះមានឱកាសហុចឲ្យ គឺកម្លាំអបានប្រមូលគ្មានសល់តែម្ដង។

លោកបានបញ្ជាក់ថា កម្លាំងសមត្ថកិច្ចទាំង២០០នាក់ នៅតែធ្វើការបិទផ្លូវទាំងអស់ ដើម្បីបន្តការរុករកនូវគ្រឿងញៀនបន្ថែមទៀត។ ដោយឡែកតុលាការចេញដីកាបញ្ជាឲ្យប្រមូល​យកទ្រព្យសម្បត្តិទាំងអស់ ដែលជារបស់ត្រកូល ឡៅតា សែនលី ដកហូតទុកជាសម្បត្តិរដ្ឋ ដោយសារតែទ្រព្យសម្បត្តិទាំងនេះ អាចបានមកពីការជួញដូរគ្រឿងញៀនរយៈពេលកន្លងមក។ បច្ចុប្បន្នជនសង្ស័យទាំងអស់ ត្រូវបានឲ្យជំនាញនាំយកទៅកាន់អង្គភាពដើម្បីសាកសួរបន្ត និងចាត់វិធានការតាមផ្លូវច្បាប់៕