ថៃ: កម្លាំងតម្រួតព្រំដែនថៃភាគខាងជើងបានផ្ទុះអាវុធមួយប្រ៉ាវ ជាមួយក្រុមរកស៊ីជួញដូរគ្រឿងញៀនឆ្លងដែន ដោយធ្វើការរឹបអូសថ្នាំញៀនប្រភេទយ៉ាម៉ា ឬយ៉ាបាចំនួន១បាឡូ ប៉ុន្តែគ្មានភាគីណាម្នាក់រងរបួស ឬស្លាប់នោះឡើយ។

ប្រភពពីសមត្ថកិច្ចថៃបានឲ្យដឹងថា កាលពីយប់ថ្ងៃទី១២ ខែតុលា ឆ្នាំ២០១៦ កម្លាំងតម្រួតព្រំដែនលេខ ៣១០៨ បានចេញល្បាតតាមខ្សែបន្ទាត់ព្រំដែនថៃភូមា ត្រង់ចំណុចតំបន់ សាន់ទិសុខ ស្ថិតក្នុងឃុំប៉ាទឹង ស្រុកម៉ែចាន់ឆន ខេត្តម៉ែហង់សន ប្រទេសថៃ ក៏បានប្រទះឃើញមុខសញ្ញាសង្ស័យប្រមាណ៥ទៅ៧នាក់ ដោយពួកគេបានសែងវត្ថុអ្វីម្យ៉ាងដូចជាបាឡូ។ ដោយមានការសង្ស័យ ទើបកម្លាំងបានស្រែឲ្យពួកគេទាំងអស់គ្នាឈប់ ដើម្បីត្រួតពិនិត្យ ប៉ុន្តែពួកគេមិនបានឈប់ទេ ហើយបានបាញ់រះលើសមត្ថកិច្ច ពេលកម្លាំងសមត្ថកិច្ចធ្វើការបាញ់តបតទៅវិញអស់រយ:ពេលមួយសន្ទុះធំ ទើបស្នូរអាវុធបានស្ងប់ស្ងាត់។ ក្រោយមកកម្លាំងបានរឹបអូសគ្រឿងញៀនប្រភេទយ៉ាម៉ា ឬយ៉ាបាចំនួនមួយបាឡូយកមករក្សាទុកពេញមួយយប់ លុះព្រឹកថ្ងៃទី១៣ ខែតុលា ឆ្នាំ២០១៦ ទើបមានកម្លាំងចម្រុះជាច្រើនអង្គភាពបានចុះទៅត្រួតពិនិត្យលើចំណុចទីតាំងដែលមានការផ្ទុះអាវុធនោះ ដោយពិនិត្យឃើញមានសំបកគ្រាប់ចំនួន៥គ្រាប់ អង្ករ ត្រីខ កំប៉ុង ទូរស័ព្ទដៃ និងបារី សម្ភារ:ទាំងនេះ គឺជាស្បៀងអាហាររបស់ក្រុមទុច្ចរិត ដែលសម្ងំលួចរកស៊ីនាំគ្រឿងញៀនឆ្លងដែនខុសច្បាប់។

បច្ចុប្បន្នវត្ថុតាងថ្នាំញៀនចំនួន៨ម៉ឺនគ្រាប់ ត្រូវបានសមត្ថកិច្ចបញ្ជូនទៅឲ្យកម្លាំងជំនាញហើយ ដើម្បីចាត់វិធានការតាមច្បាប់ ដោយឡែកមុខសញ្ញាខាងលើ កម្លាំងកំពុងបន្តការរុករកតាមខ្សែបន្ទាត់ព្រំដែនថៃ ភូមា ដើម្បីនាំខ្លួនយកមកផ្តន្ទាទោសតាមច្បាប់៕