នៅយប់ថ្ងៃ២៥ វិច្ឆិកានេះ មានការប្រកាសថាតារាចម្រៀងល្បីរបស់ប្រទេសកម្ពុជា និងប្រទេសថៃចំនួន៣រូប នឹងឡើងប៉ះគ្នានៅលើឆាកតន្ត្រី«ខ្មែរញញឹម»របស់ទូរទស្សន៍ប៉ុស្ដិ៍លេខ៥។ តារាល្បីឈ្មោះកម្ពុជារួមមាន កញ្ញា មាស សុខសោភា លោក នីកូ ខណ:ដែលតារាថៃគឺអ្នកចម្រៀងពេញនិយមកញ្ញាផេនខេក។ នេះមិនទាន់រាប់បញ្ចូលវត្តមានតារាសិល្ប:ផ្សេងទៀត រួមអ្នកនាងសុខ ស្រីនាង ដែលនឹងឡើងអង្រួនវេទិកានោះផង។

លោកហួង តារាមុន្នី អ្នកគ្រប់គ្រងកម្មវិធីតន្ត្រីប្រចាំប៉ុស្ដិ៍លេខ៥ បានថ្លែងប្រាប់ថា ការប្រគំតន្ត្រីបន្តផ្ទាល់នេះ លោកបានអញ្ជើញតារាទាំង៣ដួង ឲ្យឡើងប៉ះគ្នា ដោយលោករំពឹងថាកម្មវិធីនឹងកក្រើកមិនខុសពីដើមខែមុន ដែលតារាចម្រៀងថៃខេតទ្រីយ៉ាអ៊ីងលីស ប៉ះជាមួយពេជ្រ សោភា និងលោកដេវីត ម្ចាស់បទ«រាំញីកែងជើង»នោះទេ។
តារាល្បីឈ្មោះទាំងពីរប្រទេសនឹងមានស្ទីលប្លែក ហើយក៏ជាជំនួបលើកដំបូង ដែលអ្នកទាំងពីរប៉ះគ្នាក្នុងនាមជាតារាល្បីប្រចាំប្រទេសរៀងខ្លួន នៅលើឆាកតែមួយនោះផងដែរ។ លោកថាការប្រគំតន្ត្រី«ខ្មែរញញឹម»នេះ បានដំណើរការតាំងពីថ្ងៃពុធទី២៣ វិច្ឆិកា ដោយប្រគំតន្ត្រី៣យប់ពេញតែម្ដង ដោយគ្រាន់តែការប្រគំតន្ត្រី នៅយប់ថ្ងៃទី២៥ វិច្ឆិកា ទើបជាជំនួបរបស់តារាល្បីៗ ហើយមានការផ្សាយផ្ទាល់ នៅលើកញ្ចក់ទូរទស្សន៍ប៉ុស្ដិ៍លេខ៥ ចាប់ពីម៉ោង៨យប់តទៅ ។

លោកហួង តារាមុន្នី បានពន្យល់ថាការពិតការប្រគំតន្ត្រី «ខ្មែរញញឹម» ដែលមានជំនួបតារាថៃ និងតារាល្បីនៅកម្ពុជានេះ ត្រូវធ្វើឡើងតាំងពីដើមខែវិច្ឆិកាម្ល៉េះ ប៉ុន្តែដោយសារតែនៅប្រទេសថៃ មានការកាន់ទុកព្រះមហាក្សត្ររបស់គេ ហើយមិនអាចមកច្រៀងរាំមុនកំណត់មួយខែ នៃការកាន់ទុក្ខចំពោះព្រះមហាក្សត្រថៃ ទើបសម្រេចលើកមកធ្វើនៅថ្ងៃទី២៥ វិច្ឆិកា នៅចុងខែខុសពីដើមខែសព្វដង។ លោកថាទាំងលោកនីកូ ទាំងមាស សុខសោភា និងតារាចម្រៀងថៃផេនខេក សុទ្ធតែត្រៀមស្ទីលបង្អួតគ្នា ប៉ុន្តែលោកមិនទាន់ដឹងថាតារាណានឹងទាញការគាំទ្រ បានច្រើនជាងនោះទេ។ យ៉ាងណាមិញលោកហាក់រំពឹងយ៉ាងខ្លាំងថា តារាទាំង៣រួមទាំំងសុខ ស្រីនាង ផង នឹងធ្វើឲ្យកក្រើកឆាកតន្ត្រី នៅប៉ុស្ដិ៍លេខ៥ជ្រោយចង្វារ ដោយសារតែតារាទាំង៤មិនធ្លាប់ប៉ះគ្នា ៕