នៅលើឆាកតន្ត្រីកម្មវិធី«ខ្មែរញញឹម»នៅប៉ុស្ដិ៍លេខ៥កាលពីយប់ថ្ងៃសុក្រទី២៥ វិច្ឆិកា យប់មិញ ត្រូវគេកត់សម្គាល់ថាកក្រើកយ៉ាងខ្លាំង ជាមួយនឹងវត្តមានរបស់តារាថៃ និងខ្មែរដែលសុទ្ធតែល្បីៗចំនួន៤ដួង។ តារាដែលបានបង្ហាញខ្លួននៅក្នុងយប់នោះសុទ្ធតែបានបង្អួតស្ទីល និងក្បាច់រាំយ៉ាងរស់រវើករៀងខ្លួន ដោយតារាចម្រៀងល្បី២រូបរបស់ខ្មែរ សុទ្ធតែបានឡើងច្រៀងបទOriginal Song ធ្វើឲ្យមានភាពទាក់ទាញមហាជននោះផង។

តារាដែលបានបង្ហាញខ្លួននៅក្នុងវេទិកានោះរួមមាន អ្នកនាងមាស សុខសោភា កញ្ញាផេនខេក ជាតារាសម្ដែង និងជាតារាចម្រៀងដ៏ល្បីរបស់ប្រទេសថៃ លោកនីកូ និងអ្នកនាងសុខ ស្រីនាង។ លោកនីកូ គឺជាអ្នកបើកឆាក៥បទមុនគេ ដោយបទOriginal Song របស់លោកក្រៅពីស្ដាប់ហើយទាក់ទាញ លោកក៏បានបញ្ចេញក្បាច់រាំយ៉ាងរស់រវើកនៅលើឆាកតន្ត្រីអមដោយក្រុមរាំ។ អ្នកនាងសុខ ស្រីនាង គឺជាអ្នកចេញច្រៀងទី២ ហើយបើទោះជាបទចម្រៀងរបស់នាងមិនសូវផ្ទុះ តែ ក្បាច់រាំ និងការបង្អួតសម្រស់ អមដោយស្ទីលច្រៀងបទស្រែកៗនៅក្នុងរាត្រីនោះក៏ប្លែក ហើយកន្ត្រាក់អារម្មណ៍របស់អ្នកគាំទ្រ។ អ្នកដែលទទួលបានការគាំទ្រយ៉ាងលើសលប់លើឆាកតន្ត្រីនោះជាងគេ គឺតារាស្រីថៃកញ្ញា ផេន ខេក ដោយសារតែចម្រៀងច្រើនបទរបស់នាងភាគច្រើនត្រូវបានគេស្គាល់ ហើយស្រែកច្រៀងតាមយ៉ាងកងរំពងពេញសាលតន្ត្រី។

កញ្ញាក៏បានបង្ហាញភាពស្និទ្ធស្នាលជាមួយអ្នកគាំទ្រតាមរយ:ស្នាមញញឹម ការបន្លឺពាក្យស័ព្ទសួស្ដីជាភាសាខ្មែរ និងការអញ្ជើញឲ្យអ្នកគាំទ្រជាក្មេងៗឡើងមករាំ និងច្រៀងលើឆាកជាមួយខ្លួនយ៉ាងស្និទ្ធស្នាលផង ជាពិសេសចំពោះអ្នកគាំទ្រដែលចូលចិត្តទស្សនាការសម្ដែងរឿងភាគរបស់កញ្ញានាពេលកន្លងមក គឺសុទ្ធតែបានហ៊ោកញ្ជ្រៀវនឹងវត្តមានចេញច្រៀងរបស់តារារូបនេះ។ យ៉ាងណាមិញតារាចម្រៀង មាស សុខសោភា ដែលជាតារាចម្រៀងល្បីប្រចាំប្រទេសកម្ពុជា ក៏ប្រទាញបានសំឡេងហ៊ោកញ្ជ្រៀវយ៉ាងកងរំពឹងមិនចាញ់កញ្ញាផេនខេកនោះដែរ បន្ទាប់ពីនាងប្រឹងបញ្ចេញក្បាច់រាំយ៉ាងរស់រវើក អមជាមួយស្ទីលតុបតែងខ្លួនស្រស់ស្អាត និងបានប្ដូរស្ទីលមកច្រៀងរ៉េបជាមួយតារាប្រុសវ័យក្មេង២រូប ដែលបានស្ដាប់ហើយប្លែកត្រចៀក។

លោកហួង តារាមុន្នីអ្នករៀបចម្ការប្រគំតន្ត្រីប្រចាំនៅប៉ុស្ដិ៍លេខ៥ បានអះអាងថា នេះជាជំនួបតារាល្បីៗរបស់ប្រទេសកម្ពុជា និងថៃ ដែលលោកចាត់ទុកថាមានការគាំទ្រខ្លាំងប្រហែលគ្នា នឹងការប្រគំតន្ត្រីរវាងជំនួបតារាថៃកញ្ញា ខេតទ្រីយ៉ា អ៊ីងលីស និងពេជ្រ សោភា ជាមួយលោកដេវីដ កាលពីខែមុនដែរ។ លោកអះអាងថានៅអំឡុងខែក្រោយ ប៉ុស្ដិ៍លេខ៥នឹងចំណាយទុនអញ្ជើញតារាល្បីរបស់ថៃ និងខ្មែរ ឲ្យកាន់តែកក្រើកការប្រគំតន្ត្រី«ខ្មែរញញឹម»បន្ថែមទៀត៕