ដំណឹងចុងក្រោយ បានអះអាងថា ភាគីខាង ពេជ្រ អាវីហ្សា និងជនរងគ្រោះ ដែលតំណាងដោយអ្នកនាងព្រំ រដ្ឋា បានត្រូវរ៉ូវគ្នាហើយ បន្ទាប់ពីជនរងគ្រោះបានយល់ព្រមទម្លាក់សំណងតាមការស្នើសុំរបស់កញ្ញា ពេជ្រ អាវីហ្សា។ យ៉ាងណាមិញ កញ្ញាពេជ្រ អាវីហ្សា ត្រូវបានប្រកាសថារហូតដល់ប្រគល់សំណងគ្រប់ចំនួន និងមានការដោះស្រាយផ្លូវច្បាប់ថែមថយជាមួយមន្ត្រីជំនាញបន្ថែមទៀត ទើបត្រូវបានដោះលេងពីការឃុំខ្លួននៅការិយាល័យចរាចរជើងគោក នៅផ្លូវជា សុផារ៉ា។

អ្នកនាង ព្រំ រដ្ឋា បានសារភាពថា ឪពុកម្ដាយរបស់ជនរងគ្រោះទាំងពីរបានប្រកាន់ជំហរដាច់ខាតថាមិនទទួលសំណង៦៥០០ដុល្លារ ឬ៦០០០ដុល្លារតាមការស្នើសុំរបស់ពេជ្រ អាវីហ្សា នោះទេ ដោយបន្តទាមទារច្រើនជាង៨០០០ដុល្លារយ៉ាងដាច់អហង្ការ។ អ្នកនាងថាអ្នកនាងទេដែលបានដើរតួជាថៅកែរបស់ជនរងគ្រោះទាំង២ ហើយសម្រេចអាកាត់ខ្លួនឯងត្រឹម៦៥០០ដុល្លារក្នុងជំនួបចចារលើកទី១កាលពីព្រឹកថ្ងៃទី២៤ មីនា និងនៅរសៀលថ្ងៃដដែលបានអាកាត់ចុះត្រឹម៦០០០ដុល្លារ តាមការអង្វរកររបស់កញ្ញាពេជ្រ អាវីហ្សា។ អ្នកនាងថាគ្រួសាររបស់ជនរងគ្រោះស្ទើរតែខឹងចំពោះការអាកាត់របស់ខ្លួន ប៉ុន្តែអ្នកនាងអាងថាជនរងគ្រោះទាំង២ជាបុគ្គលិកនៅក្នុងផលិតកម្ម PR របស់ខ្លួន និងអាងថាអ្នកនាងបានយកលុយរបស់ខ្លួន ទៅប្រើក្នុងការព្យាបាលដល់ជនរងគ្រោះទាំងពីរតាំងពីកើតហេតុផល ទើបគ្រួសាររបស់ជនរងគ្រោះយល់ព្រមស្របតាមទាំងទើសទាល់។ អ្នកនាងថាគ្រួសារជនរងគ្រោះ នៅតែយល់ថាបើមិនបាន៨ពាន់ដុល្លារ នឹងដាក់បណ្ដឹងទៅកាន់តុលាការ ដោយសារសម្អាងថាពេជ្រ អាវីហ្សា ប៉ះទង្គិចម៉ូតូនៅផ្នែកខាងធ្វេងផ្លូវ និងសម្អាងថានាងមានជាតិស្រវឹង។ ប៉ុន្តែដោយសារតែអ្នកនាងមិនដាច់ចិត្តឃើញពេជ្រ អាវីហ្សា មានរឿងទើបអាកាត់ខ្លួនឯងនៅត្រឹម៦ពាន់ដុល្លារជាមួយអាវីហ្សាតែម្ដង បើទោះជាគ្រួសារជនរងគ្រោះមិនសប្បាយចិត្ត។

ពេជ្រ អាវីហ្សា និយាយថានាងមានថវិកាជារបស់ខ្លួនត្រឹមតែ២ពាន់ដុល្លារប៉ុណ្ណោះ ប៉ុន្តែដោយការអាណិតអាសូរពីសំណាក់បងប្អូន និងមិត្តភ័ក្ត្រ ទើបកញ្ញាអាចដោះស្រាយបានចំនួន៦ពាន់ដុល្លារ។ យ៉ាងណាក៏ដោយ នាងថាថវិកាដែលព្រមព្រៀងគ្នានោះ ត្រូវបានអ្នកនាងព្រំ រដ្ឋា សម្រួលអោយប្រគល់ជា២លើកដើម្បីទុកពេលអោយនាងដោះស្រាយដោយ ពាក់កណ្ដាលត្រូវប្រគល់នៅព្រឹកថ្ងៃទី២៥ មីនា និងពាក់កណ្ដាលទៀតទុកពេលអោយនាងដោះស្រាយនៅដើមសប្ដាហ៍ក្រោយ។ នាងថាការចចារត្រូវរ៉ូវគ្នាហើយ ប៉ុន្តែប្រហែលរហូតទាល់តែប្រគល់លុយបានចប់សព្វគ្រប់ ទើបនាងត្រូវបានដោះលែង៕