ចាប់តាំងពីចេញពីផលិតកម្មសាន់ដេ តារាចម្រៀងលោកនីកូ បានច្រានចោលនូវការចូលជ្រកទ្រនំរបស់ផលិតកម្មណាទាំងអស់ ដោយលោកបញ្ជាក់ថា មិនចង់មានសម្ពាធរឿងគេឲ្យច្រៀងបទចម្លង និងចេញបទឲ្យមិនស្មើគេ។
យ៉ាងណាមិញ គេនៅតែកត់សម្គាល់ថាបទថ្មីរបស់លោកដែលបាននិពន្ធឡើងមានភាពទាក់ទាញ លើឆាកតន្ត្រីរបស់ប៉ុស្ដិ៍លេខ៥ ក្នុងពេលដែលលោកបង្ហាញខ្លួនកាលពីយប់ថ្ងៃទី២៥ វិច្ឆិកា។

លោកនីកូ បញ្ជាក់ថាបទដែលលោកបកស្រាយទាំង៥បទនៅក្នុងវេទិកានោះ គឺសុទ្ធតែជាបទនិពន្ធថ្មីទាំងអស់ ដោយបទទាំងនោះគឺលោកចំណាយលុយ និងពេលវេលាផលិតផ្ទាល់ខ្លួន ក្រោយពីអស់ផលិតកម្មជ្រក តែលោកសប្បាយចិត្ត ដោយសារតែប្រឹងធ្វើច្រើនបានផលច្រើន ហើយមិនមានសម្ពាធដូចគ្នានឹងពេលនៅច្រៀងឲ្យផលិតកម្មណាមួយ។ លោកថាបទទាំងនោះក៏មានបទចម្រៀងបង្អប់នូវភាពកំប្លែង និងអត្តសញ្ញាណខ្មែរផងដែរ ដោយលោករំពឹងថាបទដែលលោកបានបញ្ចេញ នឹងទទួលបានការគាំទ្រខ្ពស់ក្រោយពេលចេញជាFull MV។

លោកថាលោកនឹងឈប់ច្រៀងបទចម្លង ហើយប្រឹងធ្វើបទនិពន្ធថ្មីឲ្យបានល្អៗ ដោយអ្វីដែលលោកចង់បាន គឺសុំឲ្យមានការគាំទ្រចំពោះបទចម្រៀងរបស់លោក ក្រោយពេលលោកសម្រេចចិត្តបោះទុនបង្កើតក្រុមការងារផលិតបទផ្ទាល់ខ្លួន ហើយលែងត្រលប់ទៅជ្រកនៅក្នុងផលិតកម្មណាទៀត។ លោកនីកូ ប្រកាសថាលោកនឹងឡើងប្រូម៉ូតបទនិពន្ធថ្មីទាំងអស់ឲ្យបានខ្លាំងក្លា ជាពិសេសនៅពេលក្បាច់រាំនីមួយៗនៅក្នុងបទដែលលោកបានច្រៀង ត្រូវបានបំបែកបានចេះស្ទាត់សម្រាប់ឡើងឆាក។

ខាងក្រោមនៃជាវីដេអូ បទនិពន្ធថ្មីរបស់លោកវីដេអូ ដែលបានឡើងច្រៀងនៅប៉ុស្ដិ៍លេខ៥ ហើយត្រូវបានគេកត់សម្គាល់ថាជាបទ Original Song ដែលមានចង្វាក់ភ្លេងពិរោះ និងមានភាពរស់រវើកជាមួយនឹងក្បាច់រាំថ្មីរបស់លោក៖