មានការភ្ញាក់ផ្អើលគួរសម បន្ទាប់ពីរឿង«ទឹកភ្នែកកក» ត្រូវបានប្រកាសថាជាស្នាដៃលើកដំបូងរបស់អ្នកនាង ប៊ុន ចាន់និមល ដែលគេស្គាល់ថាជាអតីតអ្នកនិពន្ធល្បីឈ្មោះប្រចាំផលិតកម្មសាន់ដេ។
អ្នកនាងសម្ងំបោះទុនច្រើនសែនដុល្លារ បង្កើតផលិតកម្មថ្មីមួយដែលមានឈ្មោះថា«ផលិតកម្មសាស្រ្តា ឬ Sastra Film » និងបានប្រកាសចេញថតរឿងដំបូងគឺរឿង«ទឹកភ្នែកកក»វាយលុកទីផ្សារភាពយន្ត។

អ្នកនិពន្ធដែលមានស្នាដៃរាប់មិនអស់ក្នុងបទចម្រៀងល្បីៗរបស់ផលិតកម្មសាន់ដេរូបនេះ និយាយថា បន្ទាប់ពីយល់ថាភាពយន្តសម្រាប់ម៉ោងមាសនៅលើកញ្ចក់ទូរទស្សន៍មានតម្រូវការខ្ពស់ ទើបអ្នកនាងសម្រេចចិត្តបោះទុនផលិតរឿងភាគ ដោយបានក្រុងពាលីរឿង«ទឹកភ្នែកកក»បើកឆាកនៅព្រឹកថ្ងៃទី១ ខែធ្នូនេះ។

អ្នកនាងថានេះសា្នដៃភាពយន្តភាគលើកដំបូង ប៉ុន្តែនាពេលកន្លងមក អ្នកនាងមិនត្រឹមតែមានស្នាដៃក្នុងការនិពន្ធទំនុកច្រៀងប៉ុណ្ណោះទេ គឺការដឹកនាំសម្ដែង ការរៀបចំប្លង់សម្ដែងក៏អ្នកនាងមានជំនាញផងដែរ ដោយបានរំលេចស្នាដៃថតស្ពត និងផលិតរឿងខ្លីរាប់មិនអស់។ អ្នកនាងថាខ្សែរឿង«ទឹកភ្នែកកក»ជារឿងដែលទូរទស្សន៍បាយ័នទិញសិទ្ធិយកទៅបញ្ចាំង ទើបអ្នកនាង និងក្រុមការងារត្រូវតែសម្រិតសម្រាំងស្នាដៃមួយនេះឲ្យទទួលបានការកត់សម្គាល់ដើម្បីបើកមុខផលិតកម្ម SASTRA Film ។

អ្នកនាងថារឿង«ទឹកភ្នែកកក»ជាស្នាដៃនិពន្ធថ្មីសុទ្ធសាធ តែអ្នកនាងថាអ្នកស្នេហាវិស័យភាពយន្តខ្មែរ នឹងទទួលបានរសជាតិថ្មីពីភាពយន្តនេះ ដោយសារតែមុនពេលចេញថតអ្នកនាង និងក្រុមការងារមានភាពម៉ត់ចត់លើការផលិត។
អ្នកនាងប៊ុន ចាន់និមល បន្តថាតួឯកក្នុងរឿង«ទឹកភ្នែកកក»មិនមានអ្នកណាមិនឆ្លងកាត់ការធ្វើតេសកាមេរ៉ា និងសម្ភាសនោះទេ ដោយដំណាក់កាលទី១គឺអ្នកនាងជ្រើសយកតួប្រុស២០នាក់តួស្រី២០នាក់ ដំណាក់កាលទី២ជ្រើសយកតួប្រុស៥នាក់តួស្រី៥នាក់ ដំណាក់កាលទី៣ជ្រើសយកម្ខាងៗ២នាក់ និងដំណាក់កាលចុងក្រោយគឺយកបេក្ខភាព២រូបដែលសម្រាំងបានមកសម្ដែងចុះឡើងៗជាថ្មីម្ដងទៀត ដើម្បីសម្រេចយកម្នាក់ឲ្យធ្វើតួឯក។ អ្នកនាងថាស្នាដៃនេះនឹងខ្លាំងមិនខុសគ្នានឹងអត្ថបទចម្រៀងដែលអ្នកនាងធ្លាប់បានរំលេច ដោយអ្នកនាងថាសូម្បីតែតួរាយរងក្នុងរឿងក៏ឆ្លងកាត់ការធ្វើតេសនោះដែរ។

អ្នកនាងបានតម្រូវឲ្យតួអង្គសំខាន់ៗ ហ្វឹកហាត់មុនពេលសម្ដែង និងកំណត់មិនឲ្យទទួលថតរឿងណាមួយទាំងអស់ក្នុងពេលថតរឿង«ទឹកភ្នែកកក»មិនទាន់ចប់។ អ្នកនាងថាវាដល់ពេលហើយដែលរាល់តារាសម្ដែងត្រូវសម្ដែងតែមួយរឿងឲ្យចប់មួយៗ ដើម្បីកុំឲ្យការសម្ដែងរបស់ពួកគេបែងចែកអារម្មណ៍មិនដល់ ហើយធ្វើឲ្យធ្លាក់គុណភាព។ អ្នកនាងថារឿង«ទឹកភ្នែកកក»ភាគច្រើនជាសមាសភាពតួថ្មី ប៉ុន្តែអ្នកនាងថាមិនមានតួអង្គណាមួយ សម្ដែងដោយគ្មានការហ្វឹកហាត់ និងមិនឆ្លងកាត់ការធ្វើតេសឲ្យសម្ដែង៧អត្តចរឹកផ្សេងគ្នានោះទេ។
ខាងក្រោមនេះ ជាទិដ្ឋភាពក្នុងពិធីសម្ពោធរឿង«ទឹកភ្នែកកក»ដែលផលិតកម្ម«សាស្រ្តា»របស់អ្នកនិពន្ធ ប៊ុន ចាន់និមល បានប្រារព្ធធ្វើក្រោមវត្តមានតារាសិល្ប:៖