លោក ស៊ុម វណ្ណា គ្រូបង្គោលក្រុមបាល់ទាត់វេស្ទើនភ្នំពេញ បានបង្ហាញក្តីរំពឹងថាកីឡាករទាំងអស់នឹងជួយក្រុមឲ្យខ្លាំងជាងមុនទ្វេដង ក្នុងយុទ្ធនាការពានរង្វាន់លីគកំពូល និងពានសម្តេចរដូវកាលថ្មី។

ភ្លាមៗក្រោយស្មើណាហ្គាវ៉ើល ០ – ០ កាលពីម្សិលមិញ គ្រូមានបរិញ្ញាប័ត្រកីឡាពីគុយបារូបនេះ បានសរសើរកូនក្រុមថ្មីៗ ចេះសហការណ៍គ្នាល្អ ហើយលេងដោយទំនុកចិត្តខ្ពស់ ទើបលើកជឿថាវេស្ទើននឹងខ្លាំង។

« ពិតណាស់យើងរុះរើក្រុមយកកីឡាករក្មេងៗមកជាច្រើន ប៉ុន្តែពួកគេលេងត្រូវជើងគ្នាល្អណាស់។ យើងមើលទៅ ទោះបីណាហ្គាសំបូរកីឡាករមានបទពិសោធន៍ តែកីឡាករយើងលេងដោយទំនុកចិត្ត នឹងគ្រប់គ្រងបាល់បានយ៉ាងច្រើន។ ដូច្នេះទើបខ្ញុំជឿថា វេស្ទើន នឹងខ្លាំងជាងមុនទ្វេដងទៅទៀត។» សម្តីលោក ស៊ុម វណ្ណា។

បែបណាក្តីគ្រូបង្វឹកដដែលក៏បានបង្ហាញក្តីបារម្ភខ្លះ ត្បិតកីឡាករមួយចំនួននូវខ្វះបទពិសោធន៍ប្រឡូកក្នុងលីគអាជីព ពិសេសការសម្របខ្លួនតាមផែនការណ៍ហ្វឹកហាត់របស់លោក។

មុនបើករដូវកាលថ្មីនេះ វេស្ទើនភ្នំពេញ បានផ្លាស់ប្តូរកីឡាករមួយចំនួន ដោយជំនួសមកវិញនូវកីឡាករក្មេងៗ ពីតាមខេត្ត និងយុវជនមកពីក្លឹបអាជីពមួយចំនួន។ ៣ប្រកួតមិត្តភាពចុងក្រោយ ក្លឹបតំណាងសកលវិទ្យាល័យមួយនេះពុំទាន់ស្គាល់ពាក្យថាចាញ់ឡើយ ពោលគឺស្មើខេត្តត្បូងឃ្មុំ ១ – ១ ឈ្នះ Cambodian Tiger ១ – ០ និង ស្មើណាហ្គា ០ – ០ នេះ។