ភ្នំពេញ: កាលពីវេលាម៉ោង៦ និង០៥នាទី ថ្ងៃទី៣០ ខែធ្នូ ឆ្នាំ២០១៦ កុមារា ថុល សុនី អាយុ ៨ឆ្នាំ បានរងគ្រោះដោយជណ្តើរយន្តផ្សារទំនើបស្ទឹងមានជ័យថ្មី បណ្តាលឲ្យបាក់ជើងឆ្វេង កំពុងសម្រាកនៅមន្ទីរពេទ្យកុមារជាតិ ខណ:ដែលគ្មានសាច់ញាតិចូលទៅមើលថែទាំនោះទេ។
បើតាមអ្នកដែលយកកូនទៅព្យាបាលក្នុងមន្ទីរពេទ្យកុមារជាតិ បានបញ្ជាក់ថា ឪពុកម្តាយរបស់គាត់ នៅព្រៃវែង ហើយអាអូននេះ មកសូមទាន និងដើរអនាថា នៅភ្នំពេញ ហើយពេលនេះឪពុកម្តាយអត់ដឹង ខណ:ដែល វាអត់និយាយអីសោះ ត្រឹមតែដេកលើគ្រែ មិនមាត់មិនក។
ករណីនេះបានធ្វើឲ្យលោក ឈុន សុវណ្ណភក្តី ចាងហ្វាងផលិតកម្ម BKS ដែលបានឃើញហេតុការណ៍នេះផ្ទាល់ មានក្តីអាណិតអាសូរយ៉ាងខ្លាំង ចំពោះកុមាររងគ្រោះនេះ នឹងកំពុងកៀវគរ សិល្ប:ករ ដើម្បីចូលទៅសួរសុខទុក្ខ ដល់កុមារដ៏កម្សត់មួយនេះ។
លោក ឈុន សុវណ្ណភក្តីថា «នៅល្ងាចនេះ ខ្ញុំនឹងចុះទៅសួរសុខទុក្ខដល់កុមារារងគ្រោះ បន្ទាប់ពីខ្ញុំឃើញហេតុការណ៍នេះ ផ្ទាល់ភ្នែក កាលពីរាត្រីយប់មិញ ខ្ញុំពិតជាក្តុកក្តួលក្នុងចិត្តពន់ពេក » ។ លោកថា លោកនឹងនាំតួៗរៃអង្គាស់ថវិកាពីតារា ក្នុងភាពយន្ត រឿង «អាស្ទើរទឹកប៉ះខ្មោចបែកស្លុយ» មាន នាយចឺម នាយគ្រឿន នាងខ្ញុង កញ្ញាពៅ លីដា និងតារាប្រុសស្រីជាច្រើនទៀត ដើម្បីជួយដល់ក្មេងមួយនេះ ។ ក្រៅពីនេះថវិកា របស់តួៗ ខាង BKS ក៏មានកញ្ចប់ថវិកា ក៏ដូចជាអំណោយផ្ទាល់ខ្លួន ចុះ ទៅសួរសុខទុក្ខផងដែរ ។
លោក ក៏បានអំពាវនាវ ទៅកាន់ទស្សនិកជន ឬ សិល្ប:ករ សិល្ប:ការិនី បើចង់ជួយ អាចធ្វើការខលតាមរយ:លេខរបស់លោក ផ្ទាល់ ០១០ ៥៨៨ ៤៧៦ ។
បញ្ជាក់ផងដែរ ករណី រងគ្រោះដោយជណ្តើរយន្តនេះ គឺជាលើកទី២ ហើយសម្រាប់ខែ ធ្នូ ចុងឆ្នាំ២០១៦ ដោយករណីទី១ កើតឡើងនៅ ថ្ងៃទី២១ ធ្នូ នៅអូឡាំពិក៕
មតិយោបល់