ថ្លែងពីក្នុងប្រទេសថៃអតីតតារាចម្រៀងនាងពៅ បញ្ញាពេជ្រ បានអះអាងថាបើទោះជានាងធ្លាក់ខ្លួនពិការអស់មួយជីវិត ក៏នឹងសម្រេចធ្វើចិត្ត និងរូបសម្រស់មិនអោយពិការនោះដែរ។ អ៊ីចឹងទើបគេឃើញអតីតារាស្រីរូបនេះលេងខ្លួនជាងមុន ដោយបានបង្ហោះរូបថតស្អាតៗ និងឃើញដើរលេងតាមផ្សារទំនើប និងតាមបណ្ដាហាងនានាក្នុងប្រទេសថៃតាំងពីមុនថ្ងៃឆ្លងឆ្នាំ អមដោយការប្រកាសថាឈប់ខ្វល់ពីស្ថានភាពជីវិត ថានឹងមានលទ្ធផលបែបណា ឬយ៉ាងណាទៀតហើយ។

នៅលើបណ្ដាញសង្គមហ្វេសប៊ុកនាងបានបង្ហោះថា ឆ្នាំថ្មីឆ្នាំ២០១៧នេះ បើទោះជានាងនៅតែបន្តពិការភាពមិនអាចផ្លាស់ប្ដូរ តែជំនឿចិត្ត និងការតស៊ូនឹងកើតមានថ្មីសម្រាប់រូបនាង ដោយនាងនឹងធ្វើអោយកការរស់នៅកាន់តែមានខ្លឹមសារ និងមានការសម្របខ្លួនល្អឡើងក្នុងនាមជាជនពិការម្នាក់។ នាងត្រូវគេឃើញលាបសក់ខ្មៅ និងរមែងតុបតែងកាយយ៉ាងស្រស់ស្អាតមិនខុសពីតារាដែលយកចិត្តទុកដាក់នឹងរូបសម្រស់ ដែលខុសប្លែកពីមុនរហូតធ្វើអោយអ្នកលេងហ្វេសប៊ុកលាន់មាត់សរសើរថា ពេជ្រ បញ្ញាពេជ្រ នៅពេលលេងខ្លួន ហើយថតមិនអោយឃើញជើង គឺស្អាត និងមើលមិនដឹងជាជនពិការនោះឡើយ។ អ្នកលេងហ្វេសប៊ុកសុទ្ធតែសរសើរថានាងស្រស់ស្អាតជាងមុន និងវ័យក្មេងមិនសមជានារីដែលមានអាយុជាង៣០ឆ្នាំឡើយ។ ពៅ បញ្ញាពេជ្រ ក៏ត្រូវគេឃើញលម្អដោយលំលៀកបំពាក់ជារបៀបអ្នកលេងខ្លួន និងពោរពេញស្នាមញញឹមមិនខុសពីមនុស្សដែលមានសុភមង្គលនឹងការសម្របខ្លួនផងដែរ ទើបធ្វើអោយរូបសម្រស់នាងលេចត្រដែតឡើង គ្រប់ដំណើរកម្សាន្តដែលគេកត់សម្គាល់ថា នាងយកពេលដើរលេងនៅ ក្នុងប្រទេសថៃច្រើនជាងទៅព្យាបាលជើង។ នាងបានសរសេរដដែលជាដដែលថា បើទោះជាស្ថិតក្នុងស្ថានភាពបែបណាក៏ដោយ អោយតែចេះតែរៀបចំជីវិត នោះសុភមង្គលនឹងកើតមានឡើង។ ស្របគ្នានឹងការប្រកាសនេះ ការតែងខ្លួនស្អាតៗ អមដោយការបង្ហោះពីសកម្មភាពដើរលេងពេញក្នុងប្រទេសថៃ ក៏ត្រូវគេឃើញមិនសូវទំនេរ។ នាងក៏ត្រូវគេឃើញជិះរទេះរុញដើរផ្សារទំនើប និងដើរកម្សាន្តនៅតាមតំបន់លម្ហែកាយរបស់ប្រទេសថៃស្ទើរជារៀងរាល់ថ្ងៃ ដោយរូបភាពរបស់នាង ក៏ត្រូវអ្នកលេងហ្វេសប៊ុកសរសើរថាប្លែក ក្នុងប៉ុន្មានថ្ងៃចុងក្រោយ។ នាងបានសរសេរថាឈប់ខ្វល់ពីជីវិតថាពេលណាដើរបាន ឬដើរមិនបានទៀតហើយ តែអ្វីដែលនាងធ្វើគឺសប្បាយតាមរយៈតុបតែងខ្លួនអោយស្អាត និងដើរលេងអោយស្គាល់ពិភពនៅជុំវិញខ្លួន។ នេះជាជំហរមួយថ្មី បន្ទាប់ពីពេលកន្លងមក នាងត្រូវគេឃើញសញ្ជុកសញ្ជុង នឹងការច្រៀងលេងបន្លប់ទុកតែក្នុងបន្ទប់ និងមិនសូវធ្វើខ្លួនស្អាតដូចមុនពេលប្រកាស។