បន្ទាប់ពីបានសារភាពរៀងខ្លួនថាទំនាក់ទំនងចុងក្រោយពិតជារឿងស្រឡាញ់គ្នា តារាសម្រៀង ពេជ្រ សោភា និងលោកឆឹម សក្កដា ក៏ត្រូវគេឃើញបែកធ្លាយរូបថតអោបគ្នាមួយសន្លឹកយ៉ាងកម្រផងដែរ ដែលបង្ហាញាកាន់តែច្បាស់ពីការវិវត្តន៍ស្នេហាយ៉ាងស៊ីជម្រៅរបស់អ្នកទាំងពីរ។ តារាសិល្បៈ និងអ្នកគាំទ្រដែលប្រទះឃើញរូបនេះ សុទ្ធតែកោតសរសើរថា ស្រីពេជ្រ សោភា ក្លាហានដែលហ៊ានទម្លាយចេញនូវស្នេហារបស់ខ្លួន ខណៈដែលតារាស្រីស្ទើរពេញស្រុកខ្មែរទម្លាប់បិទបាំងស្នេហា។

រូបថតមួយសន្លឹកដែលត្រូវគេប្រទះឃើញនេះ ត្រូវបានបញ្ជាក់ថាជារូបថតទើបថតថ្មី និងត្រូវធ្លាយចេញពីអ្នកគាំទ្ររបស់ពេជ្រ សោភា។ នេះជារូបភាពស្អិតរមួតទី១ បន្ទាប់ពីរូបថតអ្នកទាំងពីរកាន់ដៃគ្នា អមអោយការបង្ហោះសារផ្អែមល្ហែមដាក់គ្នា ត្រូវគេឃើញកើតមាន។ ពេជ្រ សោភា បានអះអាងថាជាខ្លួនមានការរំភើបចិត្តដែលលោកសក្កដា ក្លាហានហ៊ានសុំនាងស្រឡាញ់ត្រង់ៗ និងបានប្រកាសថាខ្លួនមានអ្នកស្រឡាញ់ក្នុងជីវិត ដោយមិនខ្វល់ពីការប៉ះពាល់កេរ្តិ៍ឈ្មោះបោះសំឡេង ដែលធ្វើអោយនាងយល់ថាជារឿងកម្រសម្រាប់តារាសិល្បៈម្នាក់។

នាងថាខ្លួនចាប់អារម្មណ៍នឹងភាពក្លាហាននោះ ប៉ុន្តែនាងនៅតែប្រកាសត្រឹមថាខ្លួនចាត់ទុកលោកឆឹម សក្កដា ត្រឹមជាមិត្តប៉ុណ្ណោះ។ នាងសរសើរដដែលជាដដែលថាភាគីខាងប្រុសជាមនុស្សក្លាហាន និងហ៊ានប្រឈមមុខ។ អ៊ីចឹងហើយទើបនាងមិនភ្ញាក់ផ្អើលចំពោះរូបថតអោបរឹត ដោយនាងប្រកាសថានោះគ្រាន់តែជារូបថតដែលមិត្តល្អម្នាក់ផ្ដល់ភាពកក់ក្ដៅដល់មិត្តម្នាក់ និងមិនចាត់ទុកជារូបភាពហួសហេតុ។ នាងថាលោកឆឹម សក្កដា គឺជាមិត្តល្អដែលនាងចាប់ផ្ដើមហ៊ានស្និទ្ធស្នាល ប៉ុន្តែដរាបណាមិនទាន់មានដំណឹងអាពាហ៍ពិពាហ៍ នោះសភាពលើសពីអោបគ្នាតិចតួចដូចដែលបានបង្ហាញនៅក្នុងរូបនេះ នឹងមិនមាននោះទេ បើទោះជាបានសារភាពថា រវាងនាង និងលោកសក្កដា ធ្លាប់កាន់ដៃគ្នាជារបៀប ស្និទ្ធិស្នាលបង្ហោះជាសាធារណៈ។

មកទល់ពេលនេះគេចាប់អារម្មណ៍ថារូបថតមួយសន្លឹកនេះ កាន់តែធ្វើអោយមហាជនបានយល់ពីចំណងស្នេហារបស់ពេជ្រ សោភា និងលោក ឆឹម សក្កដា បើទោះជាពេជ្រ សោភា ពេលខ្លះនាងមានការប្រកែកថាភាគីខាងប្រុសនៅត្រឹមជាមិត្តនៅឡើយ៕