បើទោះបីជាច្រានចោលដំណឹងភាគហ៊ុនជាមួយភោជនីយដ្ឋាន អ៊ីតាលី Raqia Republic ប៉ុន្តែតារាចម្រៀងព្រាប សុវត្ថិ បានច្រៀងខុសនូវគោលការណ៍របស់ខ្លួន តែក្នុងន័យបង្កឲ្យទស្សនិកជនចូលទៅកាន់ភោជនីយដ្ឋាន និងហាងកម្សាន្តខាងលើ សប្បាយរីករាយ ។
កាលពីរាត្រីថ្ងៃទី២០ ខែមករា ឆ្នាំ២០១៦ កំពូលតារាចម្រៀងព្រាប សុវត្ថិ បានបង្ហាញវត្តមានជាថ្មីម្តងទៀត ក្នុងហាងអ៊ីតាលី ខាងលើ ដែលបន្តឲ្យអ្នកគាំទ្រពុះកញ្ជ្រោល ខណ:ដែលកំពុងស្តាប់តន្ត្រីយ៉ាងសប្បាយរីករាយ ជាមួយនឹងក្រុម ឌីជេ មកពីកាណាដា និងក្រុមតន្ត្រីហ្វីលីពីន ដែលមានជាប្រចាំក្នុងភោជនីយដ្ឋាន និង ហាងខាងលើ។
បង្ហាញខ្លួនពីរដង ក្នុងហាងខាងលើ កំពូលតារាចម្រៀងក្នុងចិត្តយុវវ័យ លោក ព្រាប សុវត្ថិ តែងតែលើកយកបទចម្រៀងចាស់ៗមកច្រៀង ក្នុងនោះមានបទ បទថ្នម …! បទ «ខ្លុយស្នេហ៍ត្នោតទេរ» បទ «អក្ខរា» ជាដើម ។ លោក ព្រាប សុវត្ថិ បានប្រាប់ដល់អ្នកយកព័ត៌មាន Post News ថា ការលើកយកបទចាស់មកច្រៀងនេះ មិនមែនមានន័យថា រំឭកដល់លោក ជុំ ប៊ុនធឿន ឬកវីផ្សេងទេ ប៉ុន្តែដោយសារតែបទមានច្រើន ចឹងច្រៀងចុះច្រៀងឡើង វិលជុំ ដល់បទចាស់។
លោក ព្រាប សុវត្ថិ បានបន្តថា លោកគ្មានភាគហ៊ុន ក្នុងហាងខាងលើនេះទេ ប៉ុន្តែលោកចូលមកក្នុងនាមជាភ្ញៀវ និង ជាអ្នកដែលត្រូវបានគេហៅមកច្រៀងតែប៉ុណ្ណោះ ។
ជាទម្លាប់របស់ លោក ព្រាប សុវត្ថិ រាល់ការប្រគំតន្ត្រីលោកច្រៀងតែ ៣បទតែប៉ុណ្ណោះ ដោយទទួលបានថវិកា ៣០០០ ដុល្លារសម្រាប់តម្លៃខ្លួនលោកមួយលើកៗ ។ ប៉ុន្តែអ្វីដែលសំខាន់នោះ វត្តមានរបស់លោកក្នុងហាងខាងលើ លោក ព្រាប សុវត្ថិ បានច្រៀងលើសពី ៣ បទទៅទៀត ។
បុគ្គលិក ក្នុងហាងខាងលើ សូមមិនបញ្ចេញឈ្មោះ បានប្រាប់ឲ្យដឹងថា តាមពិត លោក ព្រាប សុវត្ថិ និង ម្ចាស់ហាងអ៊ីតាលី Raqia Republic បានចរចារគ្នា ដោយលោកត្រូវច្រៀងតែ ៦បទ នឹងទទួលបាន ៣ពាន់ដុល្លារអាម៉េរិក ។ ប្រភពនេះបន្តថា ពេលខ្លះ លោកព្រាប សុវត្ថិ ច្រៀងដល់ទៅ ១០បទ អ៊ីនោះ ទៅតាមអារម្មណ៍ របស់លោក ក៏ព្រោះតែលោកមានអារម្មណ៍ ដើម្បីបង្កភាពសប្បាយរីករាយដល់ ភ្ញៀវដែលចូលមកកម្សាន្ត ៕
មតិយោបល់