នៅថ្ងៃទី២៥ មករា នេះ ក្រុមតារាចម្រៀងខ្មែរ និងតំណាងតារាចម្រៀងកូរ៉េ បានប្រកាសពីគម្រោងប្រគំតន្ត្រីទ្វេភាគីធំមួយ ដើម្បីប្រមូលថវិការៃអង្គាសជួយដល់មន្ទីរពេទ្យគន្ធបុប្ផា។ គម្រោងនេះត្រូវបានប្រកាសថាជាលើកទី១ ដែលក្រុមតារាកូរ៉េ បានធ្វើការសហការជាមួយទូរទស្សន៍ NTV ដោយមានតារាល្បីៗទាំងពីរប្រទេសស្ម័គ្រចិត្តចូលរួម។

លោក គីម សុងម៉ាន់ នាយកកម្មវិធី”តន្ត្រីសុបិន្តនៃក្ដីស្រលាញ់សម្រាប់អនាគត” បានអះអាងថានៅថ្ងៃទី១៨ និង ១៩ កុម្ភ:ខាងមុខនេះ ក្រុមសិល្ប:ប្រទេសកូរ៉េ និងកម្ពុជា នឹងធ្វើការប្រគំរួមគ្នានៅទីលានមុខវត្តបុទម ដើម្បីរៃអង្គាសថវិកាជួយដល់មន្ទីរពេទ្យគន្ធបុប្ផា។ លោកថាតារាចម្រៀងកូរ៉េ មានចំនួន២ក្រុម គឺក្រុម នារី Wisdom និងក្រុម Billion K-Pop ដោយក្រុមចម្រៀងទាំងពីរនឹងច្រៀងរយ:ពេល២ថ្ងៃតែម្ដង។ លោកថាសម្រាប់តារាចម្រៀងកម្ពុជា រួមមាន តារាចម្រៀងពេជ្រ សោភា កញ្ញា យូរី លោកប៊ូទីតារាចម្រៀងសាន់ដេ លោកនេនទុំ ឌីជេកណ្ដុរ កញ្ញារ៉ាជែល កញ្ញាម៉ុក អានីត លោកគីម ថាណា តារាចម្រៀងBN លោកសីហាតារាចម្រៀង Original Song DJ អាចារ្យធំ និង តារាចម្រៀងកម្ពុជាជាច្រើនរូបទៀត។ លោកថាតាចម្រៀងទាំងអស់មួយចំនួនទទួលច្រៀងទាំងពីរថ្ងៃ និងតារាចម្រៀងខ្លះច្រៀងតែមួយយប់ ដូចជាពេជ្រ សោភា ទទួលច្រៀងនៅថ្ងៃទី១៩ កុម្ភ: ជាដើម។

លោករំពឹងថាការប្រគំតន្រ្តីជាទ្រង់ទ្រាយធំ ដើម្បីស្វែងរកថវិកាជួយដល់មន្ទីរពេទ្យគន្ធបុប្ផានេះ នឹងមានអ្នកទស្សនាកកកុញ ដោយអ្នកទស្សនាទាំងនោះ ក៍នាងធ្វើការបរិច្ចាគថវិកាផងដែរ។ លោកថាថវិកាដែលទទួលបាននឹងផ្ដល់ជូនគន្ធបុប្ផា៥០ភាគរយ ហើយចំនួន៥០ភាគរយទៀត ទុកសម្រាប់ទ្រទ្រង់មូលនិធិរបស់តន្ត្រី ដើម្បីបន្តធ្វើគម្រោងសប្បុរសធម៍បន្តទៀត ជួយដល់កម្ពុជា៕