តារាចម្រៀង​ដែលតែងតែ​ទៅកើបថវិកា ក្រៅប្រទេស ចូលរួមជួយផ្នែកសប្បុរសធម៌ ជាពិសេសដល់មន្ទីរពេទ្យគន្ធបុប្ជា លោក ហេង ធារ៉ា កាលពីវេលាម៉ោង១១ យប់ថ្ងៃទី​៣ ខែកុម្ភៈ ឆ្នាំ​២០១៧ ត្រូវបានក្រុមចោរមួយក្រុម​ដេញប្លន់ បាញ់កញ្ចក់រថយន្តខ្ទេច។​

វា​ជា​សំណាងមួយហើយ សម្រាប់ជីវិត​តារាចម្រៀង លោក ហេង ធារ៉ា ដែលក្រុមចោរបាញ់ត្រឹមបែកកញ្ចក់ ដោយមិនប៉ះពាល់ ដល់​អាយុ​ជីវិត។​

តារាចម្រៀវ​វ័យ​២៩ ឆ្នាំ​រូបនេះបានប្រាប់ Post Komsan ក៏ដូចជា Post News Media តាមរយៈទូរស័ព្ទ នៅល្ងាចថ្ងៃទី ៤ ខែកុម្ភៈ ឲ្យដឹងថា ខណៈដែលលោកកំពុងធ្វើដំណើរ​ក្នុងទិសដៅពីភ្នំពេញ ទៅកាន់​ផ្ទះនៅកំបូល ស្រាប់តែដល់​ម្តុំពោធិ៍ចិនតុង ក៏ស្រាប់តែមាន អ្នកជិះម៉ូតូមួយក្រុម លោកមិនចំណាំម៉ូតូ ក៏តាមលោក ធ្វើឲ្យលោកភ័យយ៉ាងខ្លាំង ។​

តារាចម្រៀង​ប្រុស​ខាងលើ​បានបន្តថា ឃើញដូចនោះលោកក៏បានបន្ថែមល្បឿនរថយន្ត​ហួសផ្សារចោមចៅ ត្រង់កន្លែង​សំណង់​ឆ្លងផ្លូវដែលកំពុងធ្វើ ក៏ពួកវា បានបាញ់ប្រហារពីក្រោយតែម្តង ខណៈដែលលោក បានបន្ថែមល្បឿន ដោយគ្រាប់កាំភ្លើង ត្រូវ​បញ្ជិតកញ្ចក់ខាងក្រោយ បណ្តាលឲ្យបែក ខ្ចាយតែម្តង ។ លោកថា សំណាងហើយ ដែលត្រូវផ្នែកចំហៀង បើមិនដូច្នោះទេ លោកពិតជា​អស់សង្ខារ ជាមិនខាន​។​

ទោះបីជាយ៉ាងណា លោកក៏សូមផ្តាំផ្ញើទៅកាន់មហាជន ជាពិសេស​អ្នកសិល្បៈ ឲ្យប្រយត្នប្រយែង កុំឲ្យជួបបញ្ហា ដូចជារូបលោកឲ្យសោះ ៕​