ទោះជាមានការរិះគន់យ៉ាងពេញបន្ទុកក្រោយប្រកាសសុំទាននៅលើហ្វេសប៊ុកព្រោះតែ មិនខ្វល់ពីការស្វែងរកការងារ ក៏តារាចម្រៀង និងជាពិធីការិនីនាងឌីជេ អាលីយ៉ា នៅប្រកាសសុំទានមិនឈប់នោះទេ ដោយនាងបញ្ជាក់ថាស្ថានភាពរបស់ខ្លួនពេលនេះអន់ជាងអ្នកសុំទានឆ្ងាយណាស់។

នាងប្រកាសអត់ទៅរត់តុ និងធ្វើការដែលខុសជំនាញបានទេ ដោយសារក្រពះរបស់នាងមានថ្ងៃដាច់បាយ ហើយស្ថានភាពសុខភាពរបស់នាងក៏ឈឺច្រើនជាងជា ដែលនាងចាំបាច់ត្រូវតែបន្តសុំទានយកលុយមកកែប្រែស្ថានភាពសិន មុនទទួលការងារដូចអ្វីដែលគេរិះគន់។

ឌីជេអាលីយ៉ា និយាយថាបើធៀបនឹងអ្នកសុំទាន នាងថាខ្លួននាងអន់ជាងឆ្ងាយណាស់ ដោយសារតែអ្នកសុំទានមានពេលផឹកស្រា លេងប៊ៀ និងខ្លះមានពេលដេកដួល ហើយទៅឈរសុំទាន ឬដើមសុំទានតែម៉ោងដែលពួកគេបានកំណត់។ នាងនិយាយថា«គេថាខ្ញុំសុំទានត្រូវ ព្រោះរាល់ថ្ងៃយើងប្រើហ្វេសប៊ុកប្រកាសសុំលុយគេ តែបើដឹងឲ្យស៊ីជម្រៅ អ្នកសុំទានសំណាងជាងខ្ញុំ!»។

នាងថាអំឡុង២ថ្ងៃ ឬ៣ថ្ងៃ នាងទទួលបានតែ៣ម៉ឺនរៀល ឬ៥ម៉ឺនរៀលប៉ុណ្ណោះ ដើម្បីទិញបាយទិញម្ហូប បំពេញការស្រេកឃ្លានរាល់ថ្ងៃ ខណ:ដែលលុយទាំងនោះក៏ត្រូវបានទាំងប្រទាំងប្រទើស។ តាំងពីព្រឹកដល់យប់នាងថាខ្លួនចំណាយពេលឆ្លើយសំណួរ ពីការខលសួរ និងឆាតសួរ ទម្រាំតែមានគេផ្ញើឲ្យ៥ពាន់ ឬ៣ម៉ឺន និងត្រូវចំណាយពេលច្រើនដើរទៅបើកលុយនោះ ដោយអ្នកផ្ញើលុយឲ្យខ្លះ ស្ដីថាឲ្យដែលតម្រូវឲ្យនាងបកស្រាយវែងឆ្ងាយ។ នាងនិយាយថា«អ្នកខ្លះឲ្យតែ៥ពាន់១ម៉ឺនអីទេ តែសួរយើង ហើយខ្លះដៀលថាឲ្យយើងទៀត តែខ្ញុំអត់ខឹងទេព្រោះធ្វើមិចយើងវាអត់យើងសុំទានគេចឹងហើយ តែខ្ញុំក៏អរគុណដល់អ្នកអាណិតភាគច្រើនដែរ ដែលគាត់អត់សួរយើងជ្រិញហើយ ហើយគាត់មិនដែលឲ្យយើងចេញសេវាលុយផ្ញើទេ គឺចេញឲ្យយើងរហូត!»។

នាងថាខ្លួនក៏ចង់ធ្វើការដែរ តែនាងមិនអាចទទួលបានទេ ដរាបណានាងរកតែលុយទិញថ្នាំឲ្យសុខភាពប្រសើរមិនទាន់បាន និងមិនទាន់មានសូម្បីតែបាយហូបបីពេលច្បាស់លាស់មិនបាន ដែលនាងយល់ថាបើទោះទទួលការងារក៏ធ្វើឲ្យគេមិនកើត។ ម្យ៉ាងមកពីនាងមិនចង់ទទួលការងារដែលខុសជំនាញនោះផង ទើបនាងប្រកាសសុំទានជាជាងបន្ទាបខ្លួនទៅធ្វើការដែលនាងយល់ថាធ្វើមិនបានជាប់លាប់។ នាងនិយាយថា«រាល់ថ្ងៃមានគេហៅទៅធ្វើការ តែឲ្យទទួលមិចបើមនុស្សរកតែបាយហូបអត់បានផង ឈឺក្បាលអត់កម្លាំងរកតែថ្នាំទិញលេបអត់បានផង ទៅធ្វើការមិច ខ្ញុំត្រូវមានលុយទិញខោអាវស្លៀក និងមានបាយហូបគ្រប់គ្រាន់សិន បានទៅធ្វើការកើត!»។

យ៉ាងណាមិញ នាងថាអត់ឈប់សុំទាននោះទេ ដោយសារតែនាងទទួលបានការអាណិតច្រើនជាងជេរប្រទិចថានាងធ្វើឲ្យតម្លៃអ្នកសិល្ប:អាប់ឱននោះ។ នាងសារភាពថាក្រោយការចុះផ្សាយចំពោះបាយទឹកមានអ្នកអាណិតហៅឲ្យជាងមុន ខណ:លុយកាក់ក៏មានអ្នកផ្ញើរៀងក្រែលជាងមុនបន្តិចដែរ បើទោះជានាងត្រូវចំណាយពេលឆ្លើយឆាត លើកទូរស័ព្ទឆ្លើយសំណួរ និងត្រូវដោះស្រាយរាល់ការមាក់ងាយខុសពីអ្នកសុំទានតាមទីសាធារណ:ដែលគេឲ្យលុយកាក់ដោយមិនសួរនាំមួយម៉ាត់៕