Post News Media ព័ត៌មានសិល្បៈ និងកម្សាន្ត តារា៥ដួង​ក្នុ...

តារា៥ដួង​ក្នុងរឿង​ JailBreak នឹងបង្ហាញមុខ​ជាថ្មីក្នុងភាពយន្តហូលីវូត​

យោងតាម​ប្រភពមួយដែលស្និទ្ធនឹង​មន្ត្រី​គណ:កម្មការភាពយន្តកម្ពុជា (CFC) ១រូប បានប្រាប់ឲ្យដឹងថា ខ្សែភាពយន្ត«មុនដំបូងខ្មែរ​ក្រហមសម្លាប់​ប៉ារបស់​ខ្ញុំ»របស់អ្នកស្រីអេនជែលលីណា ជូលី នឹង​ចាក់បញ្ចាំងជូនទស្សនា​ដោយ​ឥតគិតថ្លៃ ​នៅ​បីកន្លែងក្នុងប្រទេសកម្ពុជាមានដូចជា ខេត្តសៀមរាប (នៅទីលានជល់ដំរីថ្ងៃទី​១៩ កុម្ភ:) ទី​២ នៅភ្នំពេញ (ថ្ងៃទី២១ ខែកុម្ភ: នៅស្តា​តអូឡាំពិក ផ្នែកខាងក្នុង) ទី​៣ នៅទីរួមខេត្តបាត់ដំបងថ្ងៃទី​២៣កុម្ភ: ឆ្នាំ​២០១៧ ខាងមុខនេះ​។​

បើយោងតាម​ផេក​​ហ្វេសប៊ុក​ រឿង «JailBreak: ការពារ​ឧក្រិដ្ឋជន» ដែលជាភាពយន្តខ្មែរបែបវាយប្រហារ ​ល្បីបំផុត​នៅដើមឆ្នាំ ២០១៧ នេះ​ ធ្លាប់ធ្លាប់បានបង្ហោះ​នៅលើ​ផេក​របស់ខ្លួនថា តារា​របស់ខ្លួនចំនួន ៥ រូប នឹងបង្ហាញមុខ ក្នុងខ្សែភាពយន្ត របស់កំពូល​តារាភាពយន្ត​ហូលីវូត ខាងលើ​ ក្រោមចំណងជើង ថា«មុនដំបូងខ្មែរ​ក្រហមសម្លាប់​ប៉ារបស់​ខ្ញុំ» ដែលជាភាពយន្តប្រវត្តិសាស្ត្រកម្ពុជា​មួយ និយាយពីតថភាពពិតនៃរបបខ្មែរក្រហម។​
តារា៥ដួង ដែលនឹង​បង្ហាញវត្តមាន ក្នុងភាពយន្តនោះមានដូចជា៖
១.សាវិន ហ្វីលីព ហៅ Playboy

២. ឌី សូនីតា

៣. សំ ថារ័ត្ន ,តារាក្បាច់គុណល្បុក្កតោ

៤. រស់ មុន្នី

៥. ផង់ តារា ,តារាក្បាច់គុណល្បុក្កតោ ។​

អ្នកស្រីអេនជែលលីណា ជូលី កន្លងមកធ្លាប់បានបញ្ជាក់ថា ប្រទេសកម្ពុជា បានផ្លាស់ប្តូរ​ជីវិតគាត់ទាំងស្រុង ក្រោយពីគាត់​បានទទួលសុំកុមារកម្ពុជាម្នាក់​ឈ្មោះ ម៉ាដុក មកធ្វើជាកូនចិញ្ចឹម ។ អ្នកនាង​បានបន្តថា ខ្សែភាពយន្ត «មុនដំបូងខ្មែរ​ក្រហមសម្លាប់​ប៉ារបស់​ខ្ញុំ» នេះ ផលិតឡើង​ដើម្បី​ឲ្យពិភពលោក បានស្គាល់ប្រទេសកម្ពុជា កាន់តែច្បាស់ ហើយវា​ធ្វើឡើង សម្រាប់ប្រជាជន​កម្ពុជា ទាំងមូល ៕​