Post News Media ព័ត៌មានសិល្បៈ និងកម្សាន្ត ផលិតករ«កំណត់ហ...

ផលិតករ«កំណត់ហេតុនាងនាថ»ប្រកាសថតរឿងថ្មី

កាលពីយប់ថ្ងៃទី១១ កុម្ភ: ផលិកម្មឥន្ទ្រានិមិត្ត ដែលត្រូវគេស្គាល់ថាបានរំលេចស្នាដៃរឿង «កំណត់ហេតុនាងនាថ» ឡើងផ្អើលស្រទាប់មហាជននោះ បានប្រកាសជាផ្លូវការពីគម្រោងផលិតរឿងទី២របស់ខ្លួន ដោយមានទាំងការប្រកាសឲ្យដឹងពីសមាសភាពតួសម្ដែងក្នុងរឿងនោះផង។ ខ្សែរឿងនោះមានចំណងជើងថា«សរសរកន្លោង» ដោយសាច់រឿង មានឈុតភ័យរន្ធត់ និងកំប្លុកកំប្លែង ដែលខាងផលិតករកជឿថា នឹងកន្ទ្រាក់អារម្មណ៍មហាជនបានខ្ពស់។

លោករ៉ូណាន់ ជាផលិតករប្រចាំផលិតករឥន្ទ្រានិមិត្ត បានថ្លែងប្រាប់ថាដោយសារតែរឿង «កំណត់ហេតុនាងនាថ» ទទួលបានជោគជ័យ ទើបក្រុមការងារសម្រេចផលិតរឿងទី២ភ្លាមៗ ដើម្បីឆ្លើយតបនឹងការទន្ទឹងរង់ចាំរបស់អ្នកគាំទ្រ។ លោកថាខ្សែរឿងដែលមានចំណងជើងថា«សរសរកន្លោង» នឹងប្រើពេលច្រើនខែដើម្បីថត និងកាត់ត ដោយមិនទាន់ប្រាកដថានឹងរួចរាល់ ហើយអាចដាក់បញ្ចាំងជាផ្លូវការនៅពេលណាឡើយ។ ប៉ុន្តែអ្វីដែលច្បាស់ពេលនេះ គឺរឿង«សរសរកន្លោង»ត្រូវចេញថតចាប់ពីដើមខែមិនា មុនចូលឆ្នាំ និងប្រើទុនច្រើនជាងរឿង«កំណត់ហេតុនាងនាថ» ដោយអាចរង្វង់៦ម៉ឺនដុល្លារយ៉ាងតិច។ លោកថាផលិតកម្មបានសម្រេចសហការជាមួយភោជនីយដ្ឋានវីហ្វ្រេនបឹងត្របែក ធ្វើពិធីជប់លៀងអបអរភាពជោគជ័យរបស់រឿង«កំណត់ហេតុនាងនាថ»ផង និងធ្វើពិធីសន្និសីទកាសែតប្រកាសរឿងថ្មី ដោយបង្ហាញតួអង្គផង ដើម្បីឲ្យពិធីប្រកាសរឿង«សរសរកន្លោង» មានភាពខុសប្លែកពីគេ បើទោះជាត្រូវចំណាយលុយច្រើនបន្តិច។

ក្នុងពិធីជប់លៀង និងបើកសន្និសីទប្រកាសរឿងថ្មីនោះ មានការប្រកាសថា លោកទ្រី តារាវុធ ហ្វេសស៊ីប៊យ និងកញ្ញា យ៉ែម ស្រីពេជ្រ ជាតួឯកប្រុសស្រី និងតួសំខាន់ៗផ្សេងទៀតរួមមាន អ្នកនាងប៉េងប៉ោង លោក ភីម៉ៃ អ្នកនាងឆ័យលី ដាឡែន កុមារីអូន សូនីតា លោកពៅ ករុណា លោកអៀម សុខា កញ្ញា វណ្ណ: បូរមី លោកសោម សេរីវុធ និងកញ្ញាស៊ីធឿន។ ពិធីនោះក៏មានវត្តមានតារាកិត្តិយសចូលរួមច្រើនណាស់ដែរ អមដោយពិធីជប់លផង និងរាំច្រៀងយ៉ាងកងរំពងនោះ៕