ភ្នំពេញ៖ ខណ:ពេលដែលខ្សែភាពយន្ត They First Killed My Father ត្រូវបានដាក់បញ្ជាំង ២ខេត្តក្រុង មានខេត្តបាត់ដំបង កាលពីថ្ងៃទី១៨ កុម្ភ: និង រាជធានីភ្នំពេញថ្ងៃទី២១ កុម្ភ: ម្សិលមិញ គេសង្កេតឃើញមានមនុស្សណែនណាន់តាន់តាប់ចូលរួមទស្សនានូវខ្សែភាពយន្តបែបប្រវត្តិសាស្ត្រខ្មែរ។
ស្របពេលដែលការចំណាយទាំងមូលលើរឿងThey First Killed My Father មិនត្រូវបានទម្លាយចេញជាផ្លូវការ ដោយ អេនជោលីណា ជូលី ក្តោបណែនទុកក្នុងខួរនោះ ក៏ធ្លាយនូវព័ត៌មានរាយរង សម្រាប់ថ្លៃពលកម្មថត តួៗប្រជារាស្ត្រក្នុងសាច់រឿង ។
បើតាមប្រភពច្បាស់ការដែលចូលរួមសម្តែងក្នុងខ្សែភាពយន្តនោះ បានបញ្ជាក់ប្រាប់ Post Komsan ឲ្យដឹងថា សម្រាប់តួៗប្រជារាស្ត្រ ដែលចូលរួមសម្តែងមួយថ្ងៃៗ គឺស៊ីថ្លៃ ចំនួន ៣៥ដុល្លារអាម៉េរិក សម្រាប់មនុស្សម្នាក់ ។
ប្រភពដដែលបានបន្តថា មានថ្ងៃខ្លះ រឿងនេះ ត្រូវប្រើប្រាស់តួៗជាប្រជារាស្ត្រ រហូតដល់រាប់ពាន់នាក់ ដែលធ្វើឲ្យការចំណាយលើ សាច់រឿងកាន់តែកើនឡើង ដើម្បីធ្វើយ៉ាងណា ឲ្យសាច់រឿងទាំងមូល ល្អមើល និងស្តែងៗដូចរបប ៣ឆ្នាំ ៨ខែ ២០ថ្ងៃ។
សូមបញ្ជាក់ផងដែរថា ភាពយន្តខាងលើនេះ បានចាប់ផ្តើមថតដំបូង នៅដើមខែកុម្ភ: ឆ្នាំ២០១៦ ដោយមានតួសំខាន់ គឺអ្នកនាង ស្វែង សុជាតា ក្មេងស្រីដែលសម្តែងឈ្មោះ លួង (តួឯក) លោក ទេព រិនដារ៉ូ កញ្ញា ឌី សូនីតា លោក ហម ឈរ៉ា លោក សាវិន ហ្វីលីព និង លោក ជា សំណាង ជាដើម ៕
មតិយោបល់