ពេញមួយថ្ងៃទី២៩ មីនា តារាចម្រៀងអ្នកនាងខាត់ សុឃីម សកម្មក្នុងការថតបទចម្រៀងសម្រាប់អបអរចូលឆ្នាំរបស់ខ្លួនយ៉ាងគគ្រឹកគគ្រេងនៅផ្ទះកំណើតស្ថិតនៅភ្នំប្រសិទ្ធិ។ អ្នកនាងបានផលិតចំនួន១១បទ ដោយ៥បទផលិតបោះអោយហង្សមាស និង៦បទទុកបង្ហោះនៅលើ Youtube ហើយការចំណាយគឺរបស់អ្នកនាងទាំងស្រុង។

អ្នកនាងខាត់ សុឃីម និយាយថាសម្រាប់អបអរចូលឆ្នាំឆ្នាំនេះ អ្នកនាងនឹងមាន៥បទចេញលក់នៅហង្សមាស និង៦បទផ្សេងទៀតបង្ហោះនៅលើ Youtube ។ អ្នកនាងថាក្រោយកុងត្រា ហង្សមាសបានសម្រេចទទួលយកបទថ្មីដែលអ្នកនាងផលិតចំនួន៥បទ ដោយបទទាំងនោះក៏ត្រូវហង្សមាសយកទៅកែថែមថយសាច់ភ្លេង ដើម្បីអោយមានស្ដង់ដារផងដែរ។ អ្នកនាងថាខ្លួនសប្បាយចិត្តដែលហង្សមាសទទួលយកបទជាស្នាដៃដំបូងរបស់ក្រុមខ្លួន៥បទដាក់បញ្ចូលក្នុងឌីសរបស់ហង្សមាស ទើបអ្នកនាងសម្រេចចំណាយទុនផ្ទាល់ខ្លួនតែម្ដង ដោយមិនអោយហង្សមាសខ្វាយខ្វល់រឿងចាត់ចែងការផលិតនោះទេ។ អ្នកនាងនិយាយថា«ការពិតហង្សមាសគាត់សួរថាខ្ញុំត្រូវការគាត់ជួយអ្វីខ្លះ ពេលថតMV ហ្នឹង តែខ្ញុំថាកុំអោយហង្សមាសពិបាក គឺខ្ញុំសុំចំណាយទាំងអស់ ដើម្បីបញ្ចេញស្នាដៃ»។ អ្នកនាងមិនបានដឹងពីខ្ទង់ចំណាយជាក់លាក់នោះទេ ប៉ុន្តែយោងតាមលោកផាណូ ជាស្វាមីបានអះអាងថាបើគិតតម្លៃរៀបចំទាំងស្រុង គឺមិនក្រោម២ម៉ឺនដុល្លារនោះទេ។ យ៉ាងណាមិញ លោកថាការចំណាយទាំងនោះមិនដល់កម្រិតហ្នឹងទេ ដោយសារវង់តន្ត្រីរបស់ខ្លួន ហើយក្រុមតារាភាគច្រើន ក៏មកជួយសម្ដែងអោយដោយការស្ម័គ្រចិត្ត។

ក្នុងពិធីថតMV ថ្មីនោះ គេកត់សម្គាល់ថា អ្នកនាងបានរៀបចំទម្រង់ចេញថតជាលក្ខណៈបែបខ្មែរទាំងស្រុង ដោយបានរំលេចពីឧបករណ៏ភ្លេងខ្មែរដូចទ្រ ស្គរ ចាប៉ី និងខ្លុយជាដើម អមដោយសកម្មភាពលែងល្បែងប្រជាប្រិយខ្មែរ បន្ថែមពីលើការអភិរក្សចង្វាក់ខ្មែរក្នុងបទចម្រៀង។ អ្នកនាងថាខ្លួនមិនគិតតែរឿងជោគជ័យនោះទេ ប៉ុន្តែអ្វីដែលអ្នកនាងចង់បានគឺធ្វើយ៉ាងណាផលិតMV បទចម្រៀងរបស់ខ្លួនអោយល្អ ដើម្បីអោយយុវវ័យ និងមហាជនចាប់អារម្មណ៍នឹងបទដែលជាចង្វាក់ខ្មែរវិញម្ដង។

ខាងក្រោមនេះជាបទសម្ភាសន៍ជុំវិញការផលិតបទចម្រៀងរបស់អ្នកនាង សម្រាប់អបអរចូលឆ្នាំ ដោយនៅក្នុងនោះក៏មាន៥បទប្រគល់អោយហង្សមាសសម្រាប់ចេញលក់មុនចូលឆ្នាំផងដែរ៖

https://www.youtube.com/watch?v=nUpRE0Sk3vc