នៅទីបំផុតចំណងស្នេហ៍ដែលសំបូរដោយរឿងចម្រូងចម្រាស់រាប់មិនអស់រវាងតារាសម្ដែងលោក សុវណ្ណ មករា និងអ្នកនាងឈិន សុធារី ត្រូវបានបញ្ចប់ហើយ បន្ទាប់ពីភាគីខាងប្រុសបានសម្រេចចិត្តជ្រើសយកនារីដែលខ្លួនទើបនឹងបានទាក់ទងម្នាក់ផ្សេងទៀត សុំបែកជាផ្លូវការជាមួយភរិយា និងកូនទាំងទ្វេ ដោយមានទាំងចាស់ទុំដឹងឮ។ អ្នកទាំងពីរមិនច្បាស់ពីរឿងប្ដឹងលែងនៅក្នុងប្រព័ន្ធតុលាការនោះទេ ប៉ុន្តែសម្រាប់ការវិលជួបគ្នាវិញ គឺអាចនឹងគ្មានជាថ្មី។

អ្នកនាងឈិន សុធារី និយាយថាលោកសុវណ្ណ មករាពិតជាបានសម្រេចបោះបង់អ្នកនាង និងកូនភ្លោះប្រាកដមែន បន្ទាប់ពីលោក និងនារីកំណាន់ថ្មីម្នាក់ជាតារាម៉ូដែល បានប្រកាសរួមរស់ជាមួយគ្នាជាប្ដីប្រពន្ធក្រោយពេលអ្នកនាងដឹងរឿង។ អ្នកនាងថានារីដែលពាក់ព័ន្ធនឹងលោកសុវណ្ណ មករានោះ គឺជានារីតែម្នាក់ដែលខ្លួនតាមទាន់នៅផ្ទះសំណាក់ ហើយផ្ទុះរឿងប្រតាយប្រតប់ដែលខាងសារព័ត៌មានផុសញូធ្លាប់បានផ្សាយលើកមុន។ អ្នកនាងនិយាយថាលោកសុវណ្ណ មករា កាន់ជើងនារីនោះរហូតភ្លេចប្រពន្ធកូន ដោយសូម្បីតែពេលដែលនាង និងនារីនោះប្រតាយប្រតប់ជាមួយគ្នានៅផ្ទះសំណាក់ ក៏លោកជាអ្នកចាប់ឃាត់អ្នកនាងដោយកម្លាំងដៃធ្ងន់ៗបណ្ដាលឲ្យអ្នកនាងជាំសាច់ និងមានរបួសចង់ពេញខ្លួនផងដែរ។ អ្នកនាងថាខ្លួនបានសុខចិត្តចេញមុខផ្ដល់សម្ភាសន៍មិនពិតដល់អ្នកសារព័ត៌មាន ដោយថារអិលជើងដួលបណ្ដាលឲ្យមានរបួសស្នាម ដោយសារតែចង់ទុកមុខឲ្យប្ដីក្រោយបែកព័ត៌មាន និងដោយសារតែលោក សុវណ្ណ មករា គំរាមថាបើមិនកែព័ត៌មានគឺនឹងបោះបង់នាងដោយគ្មានបកក្រោយ។ យ៉ាងណាមិញ នាងថាជីវិតប្រេះស្រាំនៅតែចប់ទាល់តែបាន ដោយសារតែលោកសុំបែក និងថាមិនវិលថយក្រោយ។ អ្នកនាងប្រកាសលែងឃាត់ស្វាមីរូបនេះទៀតហើយ បន្ទាប់ពីបានឮសម្ដីប្រពន្ធក្រោយរបស់លោកសុវណ្ណ មករា ប្រកាសថាស្រឡាញ់ប្ដីនាង និងសុំរួមរស់ជាមួយប្ដីនាង ទោះជាលោក សុវណ្ណ មករា មានតែសំបកខ្លួន។ អ្នកនាងមិនទាន់ច្បាស់ពីគម្រោងប្ដឹងលែងដល់តុលាការនោះទេ ប៉ុន្តែស្ថានភាពត្រូវរ៉ូវនឹងមិនអាចកើតឡើង ដោយសារការបែកបាក់លើកនេះគឺមានចាស់ទុំដឹងឮ ហើយសម្រុះសម្រួលលែងកើត។

កាលពីយប់ថ្ងៃទី២៧ មេសា លោកសុវណ្ណ មករា បានបង្ហោះជាសាធារណ:ថា«ជូនធារីអតីតឧត្តមភរិយាបង! បងទទួលស្គាល់ថាបងមិនមែនជាប្តីល្អ មិនមែនជាឪពុកល្អទេ បងក្រីក្រហើយថែមទាំងផឹកស៊ី មានស្រីញីក្រៅផ្ទះទៀត តែអូនមិនដែលខឹងយកទោសអូសដំណើរនឹងបងឡើយ អូនថែមទាំងនៅតែស្រលាញ់បងដដែល កំហុសបងគរដូចភ្នំខ្សាច់ បងពិតជាខ្មាស់អៀនអូនណាស់ គឺខ្មាស់រហូត ដល់ថ្នាក់បងត្រូវតែចាកចេញឲ្យឆ្ងាយពីជីវិតអូនជាដាច់ខាត ដើម្បីឲ្យអូនមានអនាគតត្រចះត្រចង់លើវិថីជីវិតថ្មីនៃអូនចុះ! ចំណែកបងវិញសូមបន្តជីវិតពាលាដូចសព្វថ្ងៃរបស់បងបន្តទៀត ចំណែកកូនប្រុសស្រីយើងទាំងពីរ បងសូមចូលរួមអាហារកិច្ចចិញ្ចឹមបីបាច់រហូតដល់កូនយើងធំអាចចិញ្ចឹមជីវិតពួកគេដោយខ្លួនបាន! និស្ស័យស្នេហ៍យើងដល់វេលាដែលត្រូវតែចប់ហើយអូន គឺចប់ដោយស្នាមញញឹម ចប់ដោយសន្តិភាព យើងអាចរាប់គ្នាជាបងប្អូនបានណាអូន ….»។ ជាមួយនឹងការបង្ហោះសារភាពនេះ ក៏មានអ្នករិះគន់ចំពោះលោកយ៉ាងចាស់ផងដែរ ក្នុងការបញ្ចេញមតិ៕