ការទទួលបានផ្ទះមួយល្វែងជាអំណោយ កាលពីព្រឹកថ្ងៃទី២៧ មេសា បានធ្វើឲ្យលោករិន សាវ៉េត ត្រេកអរចង់ហោះ ដោយសារតែមួយជីវិតរបស់លោកគឺរស់នៅតែផ្ទះជួលព្រោះតែភាពក្រីក្រ។ យ៉ាងណាមិញ លោកបែរជាចង់ស្រក់ទឹកភ្នែក ដោយអះអាងថាខ្លោចចិត្តយ៉ាងខ្លាំងនៅពេលគិតដល់ភរិយាដែលបែរជាស្លាប់បាត់ មិនមានសំណាងបានរស់នៅផ្ទាល់ខ្លួន។

លោករិន សាវ៉េត និយាយថាលោកពិតជាសប្បាយចិត្តដែលទទួលបានផ្ទះមួយល្វែងនៅខាងក្រោយខណ្ឌជ្រោយចង្វារ ប៉ុន្តែលោកថានៅពេលទៅទទួលផ្ទះនោះ លោកបែរជាមានអារម្មណ៍ខ្លោចចិត្តយ៉ាងខ្លាំង ក្នុងពេលដែលភរិយារបស់លោកកាលពីនៅរស់គឺចង់មានផ្ទះផ្ទាល់ខ្លួនជាទីបំផុត ប៉ុន្តែបែរជាគ្មានសំណាង។ លោកនិយាយថាសប្បាយចិត្តសប្បាយចិត្ត ប៉ុន្តែបើឲ្យសប្បាយអស់ពីចិត្តគឺមិនមាននោះទេ ដោយសារតែលោកត្រូវរស់នៅផ្ទះនោះតែម្នាក់ឯងជាមួយកូន ដែលលោកបានចាត់ទុកថាដូចជាបាត់បង់របស់ដ៏មានតម្លៃមួយ។ លោកនិយាយថាបើភរិយារបស់លោកបានដឹងថាលោក និងកូនមានផ្ទះរស់នៅដោយមិនជួលគេមិនដូចមុន អ៊ីចឹងហើយទើបលោកសង្វេគចិត្តនៅពេលទទួលបានផ្ទះថ្មី ហើយមិនមានវត្តមានភរិយា។ លោកថាផ្ទះនោះមិនទាន់សម្រេចចិត្តចូលទៅរស់នៅថ្ងៃណានោះទេ ដោយសារតែលោកនៅបញ្ចប់ពិធីបុណ្យ៧ថ្ងៃរបស់ភរិយានៅស្រុកឲ្យរួចរាល់សិន។ យ៉ាងណាមិញ លោកថាខ្លួន នឹងធ្វើពិធីសូត្រមន្តឡើងផ្ទះថ្មីនៅថ្ងៃច័ន្ទ ទី១ ឧសភា ដើម្បីយកវេលា បើទោះជាការកំណត់ថ្ងៃរស់នៅច្បាស់លាស់នៅមិនទាន់ដឹង។ លោកថាខ្លួនត្រូវការត្រាំត្រែងនៅខេត្តតាកែវចាត់ចែងពិធីរបស់ភរិយាទាល់តែរួចរាល់សិន ទើបលោកត្រលប់មកភ្នំពេញដើម្បីសម្ពោធផ្ទះថ្មី ប៉ុន្តែសម្រាប់ការសូត្រមន្តយកវេលា គឺ កំណត់ថ្ងៃច័ន្ទដើមខែក្រោយនោះហើយ។ លោករិន សាវ៉េត បានអះអាងថាផ្ទះអំណោយដែលលោកទទួលបាននោះ គឺលោកស្រីគិតិបណ្ឌិត្យប៊ុន រ៉ានី ទិញឲ្យ បន្ទាប់ពីបានដឹងថាផ្ទះនោះមានគម្រោងសុំឲ្យម្ចាស់បុរីអនុញ្ញាតិឲ្យលោករស់នៅដោយមិនយកឈ្នូល២ឆ្នាំ។ ផ្ទះនោះស្ថិតនៅខាងក្រោយសាលាខណ្ឌជ្រោយចង្វារ ដោយលោកបញ្ជាក់ថាជាផ្ទះដែលមានតម្លៃខ្ពស់ តែលោកសុំសិទ្ធិមិនផ្ដល់តួលេខពិតប្រាកដ។ ជាមួយគ្នានោះ លោកក៏ត្រូវបានសប្បុរសជនផ្ដល់លទ្ធភាពឲ្យបញ្ជូនកូនប្រុសចូលរៀនសាលាអន្តរជាតិដោយមានអ្នកបង់ថវិកាជំនួសផងដែរ ដើម្បីជួយសម្រួលការលំបាករបស់លោកក្រោយភរិយាទទួលមរណភាព៕